पुणे – समय सारथी
भूम-परंडा-वाशी तालुक्यातील सामाजिक सेवा क्षेत्रात उल्लेखनीय कार्य असणारे डॉ. राहुल घुले यांनी महाराष्ट्र राज्याचे आरोग्यमंत्री तथा धाराशिव जिल्ह्याचे पालकमंत्री प्रा. डॉ. तानाजीराव सावंत यांच्या प्रमुख उपस्थितीत पुणे येथे एका कार्यक्रमात शिवसेनेमध्ये जाहीर प्रवेश केला. यावेळी पालकमंत्री डॉ सावंत यांनी घुले यांचे आणि त्यांच्या असंख्य कार्यकर्त्यांचे शिवसेनेमध्ये स्वागत केले व पुढील सामाजिक तसेच राजकीय वाटचालीसाठी शुभेच्छा दिल्या.
उपस्थितांशी संवाद साधताना मंत्री डॉ तानाजीराव सावंत यांनी वंदनीय हिंदुहृदयसम्राट शिवसेनाप्रमुख बाळासाहेब ठाकरे यांची शिकवण अंगिकारून आजपर्यंत माझे काम सुरू असून मतदारसंघातील सर्वसामान्य लोकांना न्याय देण्यासाठी, सर्वांगीण विकास कामांसाठी मोठ्या प्रमाणात निधी आणला आहे. तसेच ८०% समाजकारण आणि २०% राजकारण या बाळासाहेबांनी आखून दिलेल्या तत्वावर आजही आमचे काम सुरू आहे, येणाऱ्या काळात देखील मतदारसंघातील विकास कामांसाठी मी सदैव तत्पर असेल असे स्पष्ट केले.
डॉ सावंत यांची काम करण्याची कार्यपद्धती व त्यांचा विकासाचा दृष्टिकोन पाहून सावंत यांच्या बद्दल मनात आदर निर्माण झाला आहे व पालकमंत्री सावंत यांच्या नेतृत्वामुळे मतदारसंघाच्या सर्वांगीण विकासाला गती प्राप्त झाली आहे. हजारो कोटींची विकासकामे युद्धपातळीवर सुरू आहेत. येणाऱ्या काळात नामदार साहेबांच्या दूरदर्शी नेतृत्वाखाली काम करून मतदारसंघाच्या या विकासकामात डॉ तानाजीराव सावंत यांच्या सोबत इथून पुढे जोमाने कार्य करत राहू व येणाऱ्या विधानसभेत सावंत यांना यश मिळवून देण्यासाठी सर्वस्वपणाला लावू असा विश्वास यावेळी डॉ राहुल घुले यांनी व्यक्त केला.
