बीड – समय सारथी
73 कोटी रुपयांच्या भूसंपादन घोटाळ्यात तत्कालीन जिल्हाधिकारी अविनाश पाठक यांच्या घरावर छापा टाकण्यात आला. आयपीएस एम व्यंकटराम यांच्या नेतृत्वाखालील पथकाने पाठक यांच्या लातूर येथील निवासस्थानी 2 तासापेक्षा जास्त झाडाझडती घेऊन लॅपटॉप, टॅब अन् मोबाइल असे डिजिटल पुरावे जप्त केले आहे. या वस्तु फॉरेन्सिक तपास व डेटा मिळवण्यासाठी मुंबईला पाठवण्यात येणार आहेत. दरम्यान पोलिस अधीक्षक नवनीत कॉवत हे सुट्टीवरून सोमवारी रुजु होणार असुन त्यानंतर तपासाला आणखी गती येणार आहे.
पाठक यांना कोर्टाने 15 मे पर्यंत 7 दिवसांची पोलिस कोठडी सुनावली आहे. जिल्हा व सत्र न्यायाधीश श्रीमती एस. आर. शिंदे यांच्यासमोर सुनावणी झाली. भुसंपादन मावेजा घोटाळ्याशी संबंधित एकूण 154 संचिकांपैकी 148 फाईल्स पोलिसांच्या हाती लागल्या असुन 6 संचिका गहाळ आहेत, पोलिसांनी हस्तगत केलेल्या 3 फाईल्स अत्यंत महत्त्वाच्या असून, त्या न्यायाधीशांकडे सुपूर्द करण्यात आल्या आहेत. उर्वरीत मिसिंग फाईल्सचा शोध पाठक यांच्या कोठडीत घेतला जाणार आहे. 241 कोटींचा हा घोटाळा असल्याचा आरोप असुन त्यातील 73 कोटी वितरित केल्याने गुन्हा नोंद आहे.
पाठक यांची मालमत्ताही आता रडारवर आली आहे. घोटाळ्याच्या काळात त्यांच्या खात्यांवर अथवा कुटुंबीयांच्या खात्यांवर काही संशयास्पद व्यवहार आहेत का, याचीही पडताळणी होणार आहे. पाठक यांना अटक केल्याचा व कारवाईचा अहवाल राज्य सरकारला पाठवला आहे. पाठक यांच्या आवाजाचे नमुने घेतले जाणार असुन 7 दिवसांच्या कोठडीत अनेक बाबी स्पष्ट होणार आहेत. वॉईस रेकॉर्डंगमध्ये नाव आलेले 2 उपजिल्हाधिकारी आणि 1 टेझरी ऑफीसर संपर्काबाहेर असल्याचे सांगण्यात येते.
भूसंपादनाचे सर्व बनावट आदेश पाठक यांनी स्वताच्या लॅपटॉपवरूनच तयार केल्याचा युक्तिवाद तपास अधिकारी आणि सरकारी वकिलांनी न्यायालयात केला आहे.न्यायालयात हजर केल्यावर पोलिसांनी 10 दिवसांची कोठडी मागितली. याला पाठक यांच्या वकिलांनी जोरदार विरोध केला परंतु 15 मेपर्यंत कोठडी सुनावली.
सरकार पक्षाकडून ऍड योगेश सरवदे व तपास अधिकारी तथा भारतीय पोलिस सेवेतील परिविक्षाधिन अधिकारी व्यंकट राम यांनी न्यायालयात बाजु मांडली. अविनाश पाठककडून ऍड कालिदास थिगळे, ऍड कांकरिया, ऍड मिलींद वाघीरकर यांनी बाजु मांडली. एसआयटीचे प्रमुख अपर पोलिस अधीक्षक सचिन पांडकर उपस्थित होते.
