धाराशिव – समय सारथी
धाराशिव येथील जनता सहकारी बँकेच्या 7 संचालकावर रिझर्व्ह बँकेने अपात्रतेच्या कारवाई केल्यानंतर खळबळ उडाली आहे. 14 पैकी 7 संचालक अपात्र, 2 मयत व 1 तांत्रिक मुद्द्यावर निवडणूक वेळी अपात्र झाल्याने करोडो रुपयांची आर्थिक उलाढाल असलेल्या बँकेचा कारभार आता चेअरमन वसंत नागदे यांच्यासह 4 संचालकाच्या खांद्यावर राहिला आहे. दरम्यान 7 संचालकांना अपात्र ठरवून पदावरून काढुन टाकल्याचा रिपोर्ट बँकेने आरबीआयला पाठवला असल्याचे कळते. ऑक्टोबर नोव्हेंबर 26 मध्ये संचालक मंडळाचा 5 वर्षाचा कार्यकाळ संपत असुन 4 ते 5 महिन्यात निवडणुका लागु शकतात.
बँकेचे धोरणात्मक व प्रशासकीय कामकाज, कर्ज मंजुरीसह अन्य बाबीत संचालक मंडळाची भुमिका व निर्णय महत्वाचे असतात, त्यासाठी कोरमची आवश्यकता असते. 1/3 असे जनता बँकेच्या संचालक मंडळाकडे पर्याप्त कोरम असल्याचा दावा केला जात आहे. कोरम असला तरी मोठे आर्थिक निर्णय, कर्ज वाटप, एक रकमी तडजोड यासह अन्य निर्णय संचालक घेणार का ? हे पाहावे लागेल. कर्ज वाटप व एकरकमी तडजोड अन त्यातून आर्थिक ‘समृद्धी’ लाभावरून अनेक आरोप प्रत्यारोप झाले आहेत.
जनता बँकेच्या संचालक मंडळाचा 5 वर्षाचा कार्यकाळ ऑक्टोबर नोव्हेंबरमध्ये संपत असुन वर्षानुवर्षे ठाण मांडून बसलेल्या संचालकांना 2026 च्या निवडणुकीत उभे राहता येणार नाही, त्यातील काही जण नातेवाईकरुपी राजकीय वारसाची चाचपणी करीत आहेत. विद्यमान व्हाईस चेअरमन माजी आमदार वैजीनाथ शिंदे, संचालक विश्वास शिंदे, सुभाष धनुरे, तानाजी चव्हाण, श्रीमती करुणा संजय पाटील, हरी रामजीवन सूर्यवंशी, नंदकुमार नागदे या 7 जणांचा समावेश आहे तर निवृत्तीराव भोसले व सुभाष गोविंदपूरकर हे 2 संचालक मयत झाले आहेत.
रिझर्व्ह बँक ऑफ इंडियाच्या सप्टेंबर व नोव्हेंबर 22 आणि 7 नोव्हेंबर 2022 मधील नवीन नियमांनुसार कोणत्याही सहकारी बँकेच्या संचालकास सलग दहा वर्षे या पदावर कार्यरत राहता येत नाही. याच मुद्यावर पिराजी मंजुळे यांनी केलेल्या तक्रारीनंतर 7 संचालक अपात्र ठरवण्याची कारवाई करण्यात आली आहे.
2021 च्या निवडणुकीत उस्मानाबाद तालुका गटातून विश्वास शिंदे, वसंतराव नागदे, आशिष मोदाणी, उर्वरित उस्मानाबाद जिल्हा गटात तानाजी चव्हाण, सुभाष गोविंदपूरकर, प्रदीप पाटील, उस्मानाबाद जिल्ह्याच्या बाहेरील महाराष्ट्र गटात वैजिनाथ शिंदे, निवृत्ती भोसले, सुभाष धनूरे, महाराष्ट्र बाहेरील गटात नंदकूमार नागदे, महिला गटात पंकजा पाटील, करूणा पाटील, मागासवर्गीय अनुसूचित जाती जमाती गटातून राजीव पाटील यांनी निवडणूक लढवत विजय मिळवला होता.
