धाराशिव – समय सारथी
धाराशिव नगर परिषदेची सर्वसाधारण सभा आज 16 जुलै रोजी सकाळी 11.30 वाजता होणार असुन यात विविध 22 विषयावर चर्चा होणार आहे. खासदार ओमराजे निंबाळकर यांनी उद्धव ठाकरे यांना जय महाराष्ट्र करीत शिंदे गटात प्रवेश केल्यानंतर ही पहिली सभा आहे, शिवसेना शिंदे गटाचा एकही नगरसेवक नाही तर ठाकरे गटाचे 7 नगरसेवक आहेत.
ओमराजे यांच्या पाठीशी ठाकरे गटातील किती नगरसेवक जाणार किंवा आहेत याचे चित्र आज स्पष्ट होऊ शकते. ठाकरेंचे नगरसेवक हे महायुतीत सहभागी होतात का ? भुमिका बदलतात का व त्यांनी मांडलेल्या विषयांना पाठिंबा देतात का ? याकडे लक्ष लागले आहे. भाजपा महायुतीचे बहुमत असल्याने त्यांना आवश्यकता नाही तर उबाठा व शिंदे गटाने नगरसेवक यांना निवडीची मोकळीक दिली आहे तर धाराशिवची जनता मात्र रस्ते, पाणीसह नागरी समस्यांनी त्रस्त आहे.
बहुतांश नगरसेवक हे आमदार कैलास पाटील यांच्या आजही पाठीशी असल्याचे समाज माध्यमातुन दिसते. ओमराजे हे जरी शिवसेना शिंदे गटात गेले असले तरी संघटनात्मक, नगरसेवक, जिल्हा परिषद सदस्य यात फारसा फरक कागदोपत्री संख्याबळात शिवसेना उबाठा गटाला तूर्तास पडलेला नाही. अनेक जन हे दुहेरी लाभ मिळेल या आशेवर संगमावर आहेत, लाल दिव्याच्या निर्णयानंतर काही जण निर्णय घेणार आहेत.
पक्ष म्हणुन उबाठात आमदार कैलास पाटील यांच्या सोबत तर सत्तेत काम करून घ्यायचे तर शिवसेना शिंदे गटात ओमराजे यांच्यासोबत असेच काहीसे समीकरण आहे. काही जन ओम राजे यांच्या पक्ष प्रवेशाच्या पूर्वीच्या बैठकीला होते तर नंतर अनेक जन कैलास पाटील यांच्या सोबत गेले. बहुतांश नगरसेवक हे आज शिवसेनेच्या महावितरण विरोधी आंदोलनात कैलास पाटील यांच्यासोबत दिसतील असा विश्वास शिवसेना उबाठा नेत्यांनी व्यक्त केला. आंदोलन 11 तर सर्वसाधारण सभा 11.30 वाजता त्यामुळे हीच वेळ साधत काहीजण कारण देऊन वेळेची पळवाट काढणार आहेत.
