धाराशिव – समय सारथी
तुळजापूर येथील ड्रग्ज रॅकेटच्या तपासात पोलिसांना महत्वाचे धागेदोरे व पुरावे तपासात हाती लागले आहेत. तपासात पोलिसांना काही ठिकाणी सीसीटीव्ही, आरोपीच्या मोबाईलमधील ऑडियो रेकॉर्डिंग व चॅटिंग मिळाली आहे. संगीता गोळे हिच्या एका बँक खात्यात 5 कोटी मिळाले असल्याने सर्व आरोपीच्या बँक खात्याचे रेकॉर्ड मागवले आहे. आरोपीचे कॉल डिटेल्स व मोबाईलमध्ये झालेले एसएमएस संभाषण यासह अन्य पुरावे मिळाले असुन त्याचे तांत्रिक विश्लेषण सुरु आहे. पोलिसांनी आरोपीच्या आवाजाचे नमुने घेतले असुन पुरावे गोळा करण्यास सुरुवात केली आहे. तुळजापूर ड्रग्ज प्रकरणात 16 आरोपी असुन त्यातील 6 जण फरार आहेत वैभव गोळे व पिंटू तेलंग ही नावे निष्पन्न झाली असुन 4 नावे गोपनीय ठेवली आहेत. ड्रग्ज प्रकरणात 4 मार्चनंतर एकही आरोपी पोलिसांच्या जाळ्यात अडकला नाही किंवा नवीन आरोपी कागदावर निष्पन्न झाले नाहीत. ड्रग्ज सिंडीकेटचा ‘आका’ व त्या ‘आका’ ला पाठबळ देणारा ‘बोका’ उघड करण्याचे पोलिसांसमोर आव्हान आहे.
मुंबई येथील तस्कर संगीता गोळे व तिचा पती वैभव, दीर अभिनव हे सगळे कुटुंब ड्रग्ज तस्करीत सहभागी असुन पती व दीर याच्यावर तस्करीचे अनेक गुन्हे नोंद आहेत. तुळजापुरातील विश्वनाथ उर्फ पिंटू मुळे हा गेली 3 वर्षांपासुन गोळे परिवाराच्या संपर्कात असल्याचे निष्पन्न झाले असुन ड्रग्ज तस्करीचे पुरावे पोलिसांच्या हाती लागले आहेत. संगीता गोळे हिच्या एका खात्यावर 5 कोटी सापडले असुन इतर बँक खात्याचा व तीचे कोणासोबत आर्थिक व्यवहार झाले याचा शोध सुरु आहे. संगीताला 22 फेब्रुवारीला अटक केल्यानंतर 14 दिवसांच्या पोलिस कोठडीत महत्वाचे धागेदोरे मिळाले असुन बँक खाते,आर्थिक व्यवहार, कॉल डिटेल याचे तांत्रिक विश्लेषण सुरु आहे. संगीता हिचे मुंबई, लोणावळा येथेही मोठे नेटवर्क व संपत्ती आहे. संगीता व पिंटू मुळे हे गेली 3 वर्ष तुळजापूर येथे ड्रग्ज तस्करी करीत होते. संगीता जेलमध्ये आहे, पती वैभव फरार आहे तर पिंटू मुळे 13 मार्च पर्यंत पोलिस कोठडीत आहे, त्यात काय समोर येथे हे पाहावे लागेल.
पालकमंत्री प्रतापराव सरनाईक यांनी ठोस भुमिका स्पष्ट करीत ड्रग्ज तस्करावर कारवाई करण्याचे आदेश दिले. पोलिस अधीक्षक संजय जाधव व तत्कालीन अपर पोलीस अधीक्षक गौहर हसन, उपविभागीय अधिकारी डॉ निलेश देशमुख हे स्वतः यावर लक्ष ठेवुन आहेत त्यामुळे पोलिसांना अपेक्षित यश मिळत आहे. जिल्हा सरकारी वकील ऍड महेंद्र देशमुख हे सरकारच्या वतीने कोर्टात सक्षम बाजु मांडत आहेत. तामलवाडी पोलिस निरीक्षक गोकुळ ठाकुर हे दिवसरात्र तपास करीत आहेत.
