उमरगा – समय सारथी
उमरगा येथील उपजिल्हा रुग्णालयाच्या वैद्यकीय अधीक्षक डॉ कोमल हरीदास गरड (जाधव) यांना माहिती देण्याच्या कारणावरून “नोकरी घालवतो” अशी धमकी देत 5 लाख रुपयांची खंडणी मागितल्याचा तसेच त्यांच्याशी हातापाई करून विनयभंग केल्याचा गंभीर प्रकार समोर आला आहे. या प्रकरणी उमरगा पोलीस ठाण्यात दोन जणांविरुद्ध विविध कलमांन्वये गुन्हा दाखल करण्यात आला असून पोलीस पुढील तपास करत आहेत.
डॉ कोमल गरड या गेल्या दोन वर्षांपासून उपजिल्हा रुग्णालय, उमरगा येथे वैद्यकीय अधीक्षक म्हणून कार्यरत आहेत. 20 जुलै रोजीकक्षातून बाहेर येत असताना प्रफुल्ल श्रावण गायकवाड (रा. औराद) व ज्ञानेश्वर पांडुरंग जाधव (रा. तुरोरी) यांनी त्यांना गाठले. यावेळी प्रफुल्ल गायकवाड याने रुग्णालयातील जनरेटरच्या डिझेलची माहिती मागितली. त्यावर डॉ. गरड यांनी नियमानुसार अर्ज सादर केल्यानंतर माहिती दिली जाईल, असे सांगितले.
याचा राग आल्याने प्रफुल्ल गायकवाड याने, “उपसंचालक आरोग्य विभाग रेखा गायकवाड या माझ्या नातेवाईक आहेत. तुमच्याविरोधात चौकशी लावून नोकरी घालवतो, हे टाळायचे असेल तर 5 लाख रुपये द्या,” अशी धमकी दिल्याचा फिर्यादीत उल्लेख आहे. ज्ञानेश्वर जाधव यानेही 5 लाख रुपयांची मागणी केल्याचे नमूद करण्यात आले आहे.
डॉ गरड यांनी पैशांची मागणी नाकारल्यानंतर दोन्ही आरोपींनी त्यांच्याशी हातापाई करत डावा हात ओढल्याने त्यांचा विनयभंग झाल्याचा आरोप करण्यात आला आहे. त्यानंतर आरोपींनी रुग्णालयातील कर्मचारी जनाबाई कुंभार व फुलसुंदर यांच्या कक्षात जाऊन कपाटातील जनरेटर डिझेलचे रजिस्टर बळजबरीने काढण्याचा व त्याचे छायाचित्र घेण्याचा प्रयत्न केल्याने शासकीय कामात अडथळा निर्माण झाल्याचेही तक्रारीत नमूद आहे.
या घटनेनंतर डॉ गरड यांनी वरिष्ठ अधिकाऱ्यांशी चर्चा करून उमरगा पोलीस ठाण्यात फिर्याद दिली. त्यावरून पोलिसांनी प्रफुल्ल श्रावण गायकवाड व ज्ञानेश्वर पांडुरंग जाधव यांच्याविरुद्ध खंडणी, शासकीय कामात अडथळा, विनयभंग व धमकी दिल्याप्रकरणी गुन्हा नोंदवला असून पुढील तपास सुरू आहे.
