धाराशिव – समय सारथी
कै पवनराजे निंबाळकर व त्यांच्या गाडीचा चालक समद काझी दुहेरी हत्याकांड प्रकरणाच्या सुनावणी दरम्यान मुख्य संशयित आरोपी राज्याचे माजी गृहमंत्री डॉ पद्मसिंह पाटील हे ऍम्ब्युलन्समधुन दाखल झाले. यावेळी त्यांनी चेहऱ्यावर मास्क लावला होता त्यामुळे ते आजारी असल्याचा अंदाज व्यक्त केला जात आहे, व्हील चेअरवरून ते कोर्टात हजर झाले त्यावेळी त्यांचे दोन्ही पुत्र आमदार राणाजगजीतसिंह पाटील व पृथ्वीराज पाटील हे सोबत होते. कोर्टाने 20 जुन ही निकालासाठी तारीख ठेवली आहे.
निकाल पत्रात काही दुरुस्ती असुन कोर्टाला काही काळ सुट्टी होती, स्टेनोग्राफर सुट्टीवर असतानाही कोर्टाने निकालावर काम केले, त्यात काही दुरुस्ती आहेत. सीबीआयचे वकील हे नागपूर येथे दुसऱ्या एका प्रकरणात गेले होते, त्यांनी तारीख वाढवण्याची विनंती केली ती मान्य करण्यात आली.
निकाल देण्यासाठी आणखी काही दिवस लागतील असे म्हणत कोर्टाने निकालाची तारीख वाढवली आहे. 16 जुन रोजी निकाल अपेक्षित होता मात्र 20 जुनला कोर्ट निकाल जाहीर करणार आहे. डॉ पद्मसिंह पाटील यांच्यासह सर्व 9 आरोपीना कोर्टात हजर राहण्याचे आदेश कोर्टाने दिले होते त्यानुसार 8 आरोपी हे प्रत्यक्ष कोर्टात हजर होते तर शुटर महात्मा उर्फ पिंटू सिंग चौधरी दुसऱ्या एका गुन्ह्यात बिहार राज्यातील सिवान जेलमध्ये आहे.
मुंबईतील अतिरिक्त सत्र न्यायाधीश तथा विशेष न्यायाधीश एस आर नावंदर यांच्या कोर्टात सुनावणी सुरु आहे. 16 जुनच्या सुनावणीला पवनराजे निंबाळकर यांच्या पत्नी आनंदीदेवी, मुलगा खासदार ओमराजे, डॉ जयप्रकाश राजे तर काझी यांच्या पत्नी व मुलगा हजर होते.
