धाराशिव – समय सारथी
तुळजापूर येथील ड्रग्ज तस्करी गुन्ह्यातील आरोपी विनोद गंगणे यांचा जामीन अर्ज धाराशिव येथील कोर्टाने फेटाळला असुन कोर्टाने जामीन देण्यास नकार दिला आहे. वैद्यकीय कारण देत गंगणे यांनी यापुर्वी 2 वेळेस जामीन अर्ज दाखल केला होता तो फेटाळण्यात आला त्यानंतर नियमित अर्ज देखील जिल्हा व सत्र न्यायाधीश टी जी मिटकरी यांनी फेटाळत जामीन नाकारला. गंगणे यांचा ड्रग्ज तस्करीतील सहभाग वाढला असुन त्यांच्या अडचणीत वाढ झाली आहे. पोलिसांनी लेखी म्हणणे मांडत गंगणे यांच्या जामिनीला विरोध केला तर सरकारी सरकारी वकील ऍड महेंद्र देशमुख यांनी कोर्टात सक्षमपणे बाजु मांडली.
गंगणे यांचा जामीन 6 जुन रोजी नाकारल्यानंतर त्यांना पोलिसांनी अटक केली, त्यानंतर त्यांना 9 जुन पर्यंत व वाढीव 12 जुनपर्यंत पोलिस कोठडी दिली. पोलिस कोठडी दिल्यानंतर त्यांना न्यायालयीन कोठडी देण्यात आली, वैद्यकीय कारणाने 3 दिवस रुग्णालयात उपचार घेतल्यानंतर गंगणे यांची धाराशिव जिल्हा कारागृहात रवानगी करण्यात आली.जामीन नाकारल्याने गंगणे यांचा धाराशिव जिल्हा कारागृहातील मुक्काम वाढला आहे. पोलिसांनी तपास करताना गंगणे यांच्या बाबतीत ठोस कागदपत्रे जमा करीत ती कोर्टात सादर केली. गंगणे यांना अटक केल्यानंतर सोलापूर येथील पिंटू सुर्वेला अटक केली.
ड्रग्ज तस्करी गुन्ह्याचे स्वरूप, उपलब्ध पुरावे व गंगणे यांचा या गुन्ह्यातील सहभाग याबाबत ऍड महेंद्र देशमुख यांनी बाजु मांडली. गंगणे यांनी ड्रग्ज सेवनाला प्रोत्साहन दिले, गुन्हेगारी स्वरूपाचा कट रचून ड्रग्ज खरेदी केली व त्याची साठवणूक केली त्याचा सहभाग हा मोठा असुन त्यामुळे तुळजापूर येथील अनेक तरुणांना व्यसन लागले असा युक्तिवाद ऍड देशमुख यांनी केला. गंगणे यांचे इतर आरोपी सोबत असलेले आर्थिक व्यवहार, संभाषण व इतर पुरावे मिळाले असुन सहभागी वाढला आहे असे सांगत ऍड देशमुख यांनी कलम 29 कोर्टात वाचून दाखवले. गंगणे यांचे गुन्ह्यात नाव आल्यावर त्यांनी 2 मोबाईल गहाळ झाल्याची तक्रार केली, हे कृत्य त्यांची गुन्हेगारी मानसिकता दर्शवते, पोलिस कोठडीतील जास्त काळ रुग्णालयात गेला त्याकाळात 2 मोबाईल दिले नाहीत, त्यांची गुन्हेगारी पार्शवभूमी हे मुद्दे अडचणीचे ठरत आहेत.
विनोद गंगणे हे पोलिसांचे खबरी असुन त्यांनी ड्रग्ज तस्करी गुन्ह्याची टीप पोलिसांना दिली, त्यामुळे आरोपी अटक झाले व रॅकेटचा भांडाफोड झाला. ते व्यसनमुक्त झाले असुन त्यांचा सहभाग केवळ सेवनापुरता मर्यादित असल्याचे गंगणे यांचे वकिल श्रेयश गवळी यांनी कोर्टात सांगितले. गंगणे यांनी जे 12 लाखांचे ड्रग्ज खरेदी केले ते स्वतःसाठी सेवनासाठी होते त्यांनी विक्री केली नाही असे ते म्हणाले. वैद्यकीय कारण असल्याने जामीन अर्ज लवकर निकाली काढत जामीन द्यावा अशी मागणी गंगणे यांच्या वकिलांनी केली.
तुळजापूर ड्रग्ज तस्करीत 38 आरोपी असुन त्यातील 21 जण अटकेत असुन 16 जन फरार आहेत तर अलोक शिंदे यांना अटकपुर्व जामीन मिळाला आहे. फरार आरोपींचा शोध पोलिसांची विविध पथक घेत आहेत, आणखी काही आरोपी निष्पन्न होण्याची यानिमित्ताने शक्यता आहे. तुळजापूर ड्रग्ज प्रकरणात 15 आरोपींची जामीन कोर्टाने नाकारली आहे. पोलिस अधीक्षक रितु खोकर व अपर पोलीस अधीक्षक शफकत आमना, उपविभागीय अधिकारी डॉ निलेश देशमुख यांच्या मार्गदर्शनाखाली सपोनि गोकुळ ठाकुर हे तपास करीत आहेत.
धाराशिव कोर्टात 6 आरोपींचे जामीन अर्ज प्रलंबित आहेत. त्यात 21 जुन रोजी तस्कर गटातील फरार आरोपी उदय शेटे, सेवन गटातील जेलमधील आरोपी आबासाहेब पवार यांच्या जामीन अर्जावर सुनावणी होणार आहे. 24 जुनला सेवन गटातील माजी सभापती शरद जमदाडे व जेलमधील अटक आरोपींची नियमित सुनावणी होणार आहे. 25 जुनला सेवन गटातील फरार आरोपी जगदीश कदम पाटील व 27 जुनला रणजित पाटील यांच्या अर्जावर सुनावणी होणार आहे.
