धाराशिव – समय सारथी
तुळजापूर येथील चित्रा ताई पाटील हत्याकांडातील आरोपी ओम निकम याची 4 दिवसांची पोलिस कोठडी आज संपणार असुन पोलिस त्याला तुळजापूर येथील कोर्टात हजर करणार आहेत. चित्रा ताई यांनी ओमला पोटच्या मुलासारखे सांभाळले मात्र लग्न जमल्याचा बहाणा करुन तो त्यांना घेऊन गेला व सोन्यासाठी त्याने आई समान चित्रा ताई यांचा निर्घृण खुन केला.
आरोपी ओम हा ‘शातीर’ असुन तो सोने लुटल्याचे ठोस कारण सांगत नाही. त्याने पोलिसांना गुंगारा देण्यासाठी चित्रा ताई यांच्या अंगावर असलेले मिनी गंठण, हातातील अंगठी व एका कानातील कर्णफूल तसेच ठेवले. पोलिसांनी तपासा दरम्यान ओमने लुटलेले जवळपास 11 तोळे सोने व चार चाकी गाडी जप्त केली असुन त्याला सोने लुटण्याची गरज का पडली, त्याला सोन्याचा मोह का झाला यासह या हत्याकांडातील कारणांचा उलघडा होणार आहे. सपोनि नामदेव मद्दे हे याचा तपास करीत आहेत.आरोपीच्या वतीने ऍड अमोल वरुडकर बाजु मांडत आहेत.
संग्राम पाटील यांनी दिलेल्या फिर्यादीनुसार ते व त्यांची आई एकत्र राहत होते, त्यांच्या आईच्या गळ्यात नेहमी दीड तोळ्याचे गंठण, पाटल्या असे 15 ते 16 तोळे सोने असायचे, त्या नेहमी ते सोने वापरत असत. शेजारील राहणारा 21 वर्षीय ओम निकम हा नेहमी घरी यायचा, त्याच्या लग्नाची व लग्न ठरल्याची बोलणी करायचा. 18 जुलै रोजी चित्रा ताई घरी नव्हत्या त्यावेळी त्यांच्या मुलाने घरी आल्यावर पत्नीस विचारले की, आई कुठे आहे तेव्हा त्या ओम निकम सोबत फोन आल्यावर कुठेतरी गेल्याचे सांगितले. त्या दिवशी रात्री उशीरा ओम निकम याला अनेक फोन केले मात्र त्याने आई सोबत नसल्याचे सांगितले त्यानंतर त्या बेपत्ता असल्याची तक्रार केली, पोलिसांनी तपास केल्यावर चित्रा ताईचा मृतदेह सापडला व त्यांच्या अंगावर काही दागिने नव्हते, ओम याच्यावर भारतीय न्याय संहिता कलम 103(1) अन्वये गुन्हा नोंद करण्यात आला आहे.
चित्रा ताई यांनी ज्या ओमला स्वतःच्या मुला, लेकरासारखं सांभाळल, त्याच्या सुखदुःखात आईसारखी खंबीरपणे आधार दिला त्याच मुलाने त्यांचा विश्वासघात केला, त्याचा गळा दाबून खुन केला व अंगावर असलेले सोन्याचे दागिने लुटले. माणुसकीला काळिमा फसणारे हे कृत्य घडले असुन यामुळे ज्येष्ठ नागरिक यांच्या सुरक्षेचा प्रश्न निर्माण झाला आहे.
