पोलिसांची ‘त्या’ 4 जणासह अन्य 6 नवीन आरोपींची कोर्टात माहिती – धाराशिव पोलिसांची मोठी कारवाई
धाराशिव – समय सारथी
महाराष्ट्राची कुलस्वामिनी आई तुळजाभवानी मातेच्या तुळजापुरात गेल्या 3 वर्षांपासुन सुरु असलेल्या ड्रग्ज रॅकेटचा उलगडा करण्यात अखेर पोलिसांना मोठे यश आले आहे. पोलिसांनी कोर्टात ड्रग्ज तस्करीचा मास्टर माईंडला आरोपी केले आहे, पोलिसांनी कोर्टात 12 वॉन्टेड आरोपींची नावे जाहीर केली आहेत. पोलिसांनी गोपनीय ठेवलेली 4 नावासहित अन्य नवीन 6 आरोपीची माहिती कोर्टात दिली आहे. पोलिसांनी विनोद उर्फ पिटू विलास गंगणे याच्यासह चंद्रकांत उर्फ बापू कणे याला आरोपी केले आहे. या सर्वांचे आर्थिक व्यवहार, कॉल डिटेल व इतर माहिती तपासात मिळाली आहे, आगामी काळात आरोपींची संख्या वाढू शकते. दैनिक समय सारथी बातमीच्या पाठपुराव्याला यश आले असुन यापुढेही सामाजिक विषय म्हणुन ड्रग्ज विरोधी मोहीम सुरूच असणार आहे.
पोलिसांनी गोपनीय ठेवलेले 7 नंबरचा आरोपी इंद्रजीतसिंग उर्फ मिटू रणजीतसिंह ठाकुर, नळदुर्ग, 10 नंबर आरोपी म्हणुन चंद्रकांत उर्फ बापु कणे, 11 नंबर प्रसाद उर्फ गोटन कदम परमेश्वर, 12 नंबर आरोपी म्हणुन उदय शेटे या 4 गोपनीय आरोपीची नावे अखेर उघड केली असुन वॉन्टेड घोषित केले आहे. नवीन 6 आरोपीत 20 नंबर आरोपी म्हणुन विनोद उर्फ पिटू विलास गंगणे, 21 नंबरला गजानन उर्फ हांग्या प्रदीप हंगरकर, 22 ला शरद रामकृष्ण जमदडे, 23 ला आबासाहेब गणराज पवार, 24 ला अलोक शिंदे व 25 नंबर आरोपी म्हणुन अभिजीत गव्हाड याची नावे जाहीर केली आहेत. मुंबई येथील संतोष खोत व तुळजापूर येथील स्वराज उर्फ पिनू तेलंग हे सर्व 12 आरोपी फरार असुन पोलिस त्यांचा शोध घेत आहेत.
पालकमंत्री प्रतापराव सरनाईक, खासदार ओमराजे निंबाळकर, आमदार कैलास पाटील यांनी ड्रग्ज प्रकरणी संसद, विधीमंडळात आवाज उठवला. आमदार राणाजगजीतसिंह पाटील यांनी 3 वेळेस ड्रग्ज तस्करीबाबत लागणारी माहिती, टीप पोलिसांना दिली त्यामुळे तुळजापुरात वाढत असलेल्या ड्रग्ज रॅकेटचा भांडाफोड झाला. काही राजकीय पक्षाशी व व्यक्तीशी संबंधित आरोपी असले तरी ते उघड झाल्याने ड्रग्ज तस्करीची कीड नष्ट होईल अशी आशा आहे. पोलिस अधीक्षक संजय जाधव व अपर पोलीस अधीक्षक शफकत आमना मॅडम, तत्कालीन अपर पोलिस अधीक्षक गौहर हसन, उपविभागीय अधिकारी डॉ निलेश देशमुख हे स्वतः यावर लक्ष ठेवुन आहेत. जिल्हा सरकारी वकील ऍड महेंद्र देशमुख हे सरकारच्या वतीने कोर्टात सक्षम बाजु मांडत आहेत. तामलवाडी पोलिस निरीक्षक गोकुळ ठाकुर हे तपास करीत आहेत. या सर्व टीमच्या तपासामुळे रॅकेटचा भांडाफोड झाला.
स्थानिक गुन्हे शाखेचे सपोनि सुदर्शन कासार व त्यांचे पथक हे तुळजापूर उपविभागात गस्त करीत असताना त्यांना गोपनीय बातमीदाराकडून माहिती मिळाली त्यानंतर कारवाई करण्यात आली. पोउपनि लोंढे, स्थानिक गुन्हे शाखेचे पोलीस हवालदार शौकत पठाण, प्रकाश औताडे, फहरान पठाण, जावेद काझी, चालक रत्नदिप डोंगरे, नितीन भोसले, तामलवाडी पोलीस ठाण्याचे पोलीस अंमलदार माने, सलगर, सुरनर, चौगुले, चालक शेख यांच्या पथकाने केली आहे.
तुळजापूर येथील अमित उर्फ चिमू अशोकराव आरगडे व युवराज देविदास दळवी आणि नळदुर्ग येथील संदीप संजय राठोड या 3 आरोपीना 45 ग्रॅम ड्रग्ज असलेल्या 59 पुड्या ड्रग्जसह 14 फेब्रुवारीला तामलवाडी येथे रंगेहात अटक करण्यात आली. त्यानंतर या 3 आरोपीना ड्रग्ज पुरवठा करणारी मुंबई महिला तस्कर संगीता गोळेला 22 फेब्रुवारी,संतोष खोतला 27 फेब्रुवारी,तुळजापूर तालुक्यातील सराटी येथील विश्वनाथ उर्फ पिंटू मुळे याला 28 फेब्रुवारीला अटक करण्यात आली. सोलापूरहुन ड्रग्ज खरेदी करणारे सयाजी चव्हाण, सुमित शिंदे, ऋतूराज गाडे व संकेत शिंदे या 4 जणांना 18 ग्रॅम ड्रग्ज असलेल्या 30 पुड्या ड्रग्जसह 4 मार्च रोजी अटक करण्यात आली. यातील अरगडे, दळवी, राठोड, संगीता गोळे, संतोष खोत, पिंटू मुळे, सयाजी चव्हाण, सुमित शिंदे, ऋतूराज गाडे, संकेत शिंदे हे 10 जण जेलमध्ये आहेत. पुणे येथील सुल्तान उर्फ टिपू शेख, सोलापूर येथील जीवन साळुंके व राहुल कदम – परमेश्वर हे 3 जण पोलिस कोठडीत आहेत.
