भुम – समय सारथी
धाराशिव जिल्ह्यात दरोड्याचे सत्र सुरूच असुन भूम शहरातील सराफा व्यावसायिक विनायक हनुमंत दहिवाळ व त्यांच्या वडिलांवर अज्ञात शस्त्रधारी चार जणांनी बंदुकीतुन गोळीबार करीत प्राणघातक हल्ला केला, या हल्ल्यामध्ये सराफा व्यवसायिक विनायक दहीवाळ हे जखमी झाले आहेत त्यांच्या पायास बंदुकीची गोळी लागली आहे. शुक्रवार दि 29 डिसेंबर रोजी रात्री 8 वाजनेच्या सुमारास ही घटना भुम शहरातील समर्थनगर परिसरात घडली,या घटनेने एकच खळबळ उडाली आहे .
याबाबत अधिक माहिती अशी की, भूम शहरात नगर पालिकेसमोरील वेताळ रोडवर विनायक दहिवाळ यांचे श्री सिद्धिविनायक ज्वेलर्स नावाचे सोन्या -चांदीच्या दागिन्यांचे दुकान आहे. ते दररोज प्रमाणे आपले दुकान बंद करून समर्थनगर येथील घराकडे निघाले होते, ते घरापासून काही अंतरावर पोहचले असता अज्ञात चार जणांनी त्यांच्यावर प्राण घातक हल्ला केला. दोन जणांनी विनायक दहिवाळ तर दोन जणांनी त्यांचे वडील हनुमंत दहिवाळ यांना पकडून त्यांच्याकडील सोन्या – चांदीचे दागिने व पैसे असणारी बॅग पळविण्याचा प्रयत्न केला मात्र तो प्रयत्न अयशस्वी झाला .
या हल्ल्यात विनायक दहिवाळ यांनी एकास पकडले व बाकीचे आरडा ओरडा एकूण पळाले या झटापटीत त्या अज्ञाताने विनायक दहिवाळ यांच्यावर गोळी झाडली.ती गोळी त्यांच्या उजव्या पायाच्या तळव्यास चाटून गेली. यावेळी हा आरडा ओरडा एकूण आसपासचे नागरिक मदतीला धावले होते मात्र त्या हल्लेखोराकडील बंदूक पाहून माघारी पळाले,गोळी झाडून आरोपी पळून गेले.
जखमी दहिवाळ यांना तात्काळ उपचारासाठी भूमच्या ग्रामीण रुग्णालयात दाखल करण्यात आले तेथे वैद्यकीय अधिकारी शशिकांत खराडे यांनी उपचार केले.घटनेची माहिती मिळताच भूम पोलिसांचे पथक घटनास्थळी पोहचले. उपविभागीय पोलीस अधीकारी गौरीप्रसाद हिरेमठ,पो नि प्रल्हाद सूर्यवंशी यांच्यासह पोलीस पथकाने तात्काळ घटनेचा पंचनामा करण्याची प्रक्रिया चालू केली
असा दगाफटका आपणास होईल यासाठी श्री दहिवाळ हे दररोज रस्ता बदलून घराकडे जात होते, ते घराकडे चालले असता फ्लोरा चौकात आले असता त्यांना या प्रकराची पुसटशी जाणीव झाली म्हणून त्यांनी वेगळ्या रस्त्याने घर गाठण्याचा प्रयत्न केला, घरापासून अवघ्या १०० मी अंतरावर या हल्लेखोरांनी त्यांना गाठले मात्र त्यांच्या यशस्वी प्रतिकारामुळे लुटीचा डाव फसला आहे.
