धाराशिव – समय सारथी
तुळजाभवानी देवीच्या गाभाऱ्यात सोलापूर येथील मटका किंगने प्रवेश केल्याच्या प्रकरणावरून शिवसेना उबाठा गटाचे नेते अंबादास दानवे यांनी आमदार तथा मंदीर विश्वस्त राणाजगजीतसिंह पाटील यांच्यावर टीका करीत हल्लाबोल केला. मंदीर संस्थान काय त्यांची जहागीरी आहे काय? ते काय मुख्यमंत्री आहेत काय? असे म्हणत त्यांनी यातील दोषीवर कारवाईची मागणी केली.
तुळजाभवानी देवीच्या गाभाऱ्यात भोपे पुजारी सोडता इतरांनी प्रवेश करू नये असा दंडक असुन तो सर्वांनी पाळला पाहिजे. तुळजाभवानी देवीच्या गाभाऱ्यात सोलापूर येथील तडीपार गुंड असलेला मटका किंग अरुण उर्फ दादा रोडगे याने थेट प्रवेश करून दर्शन घेत फोटोसेशन केले यावेळी आमदार राणाजगजीतसिंह पाटील यांचे स्वीय सहायक सुधीर जमदाडे हा सोबत होता. राणाजगजीतसिंह हे धाराशिवचे मसीहा झाले आहेत असा उपरोधीक टोला दानवे यांनी लागवला.
व्हीआयपी पासचा घोटाळा हा त्यांचा पीए करीत आहे अशी माहिती आहे. तुळजाभवानीचे संस्थान काय त्यांच्या नावावर केले आहे काय ? त्यांची ही जहागिरी आहे काय ? जिल्हाधिकारी यांना कारवाई करायला लावणारा तो काय राज्याचा मुख्यमंत्री आहे काय ? तो एक आमदार आहे, त्याने त्याचे काम करावे असे दानवे म्हणाले.
तुळजाभवानी देविजींचे फोटो मंदिर संस्थानकडून अधिकृत रित्या काढले जातात तथापि, श्री तुळजाभवानी देविजींचे फोटो तसेच व्हिडीओ कोणत्याही विधी दरम्यान किंवा इतर वेळी अन्य कोणीही वैयक्तिक रित्या काढु नयेत अन्यथा संबंधितांवर देवुळ कवायत कलम 24 व 25 अन्वये संबंधितावर कारवाई करण्यात येईल अशी नोटीस मंदीर व्यवस्थापक तहसीलदार माया माने यांनी काढली होती, त्यामुळे आता कोणावर व कधी कारवाई होते असा सवाल विचारला जात आहे.
दररोज हजारो भाविक, वारकरी, वृद्ध आणि सामान्य जनता तासनतास रांगेत उभी राहून अत्यंत श्रद्धेने नियमांचे पालन करत दर्शन घेतात. मात्र, दुसरीकडे काही प्रतिष्ठित व गुन्हेगारी पार्श्वभूमी असलेल्या व्यक्तींकडून मंदिराचे सर्व कायदे, संकेत आणि प्रोटोकॉल पायदळी तुडवले जात असल्याचा गंभीर प्रकार असुन कारवाई करण्याची मागणी भोपे पुजारी मंडळाचे अध्यक्ष अमर राजे कदम यांनी केली आहे.
तुळजाभवानी मंदिरात गाभाऱ्यात जो प्रकार घडला आहे त्याची चौकशी करून दोषींवर कारवाई करण्याबाबत जिल्हाधिकारी तथा अध्यक्ष श्री तुळजाभवानी मंदिर संस्थान यांना सूचना दिल्या आहेत. जे कोणी दोषी असतील त्यांच्यावर निश्चित कारवाई करण्यात येईल, अशी प्रतिक्रिया आमदार पाटील यांनी सोशल मीडियावरून दिली.
हातच्या काकणाला आरसा कशाला ? याप्रमाणे उघड उघड ते सर्व गाभाऱ्यात दिसत असताना आता आमदार कोणती चौकशी करणार हा प्रश्न आहे. गेली काही काळापासून त्यांनी मनमानी कारभार व मंदीराला खासगी मालमत्ता समजली आहे, जे की चुकीचे आहे. तुम्ही मुंबईतील ताज मध्ये आहेत की दिल्लीत याचे भाविकांना देणे घेणे नाही, कारवाईचा बोला ? पीएवर काय कारवाई करणार, कोणाच्या आदेशाने तो सोबत गाभाऱ्यात गेला, परिसरातील सीसीटीव्ही तपासा. पाठराखण व केवळ वेळ काढुपणा करण्यासाठी ‘हाताची घडी तोंडावर बोटं’ अश्या स्वरूपाची ही नाटकी दुटप्पी भुमिका असल्याचा आरोप पुजारी मंडळाचे अध्यक्ष अमरराजे कदम यांनी केला आहे
