धाराशिव – समय सारथी
तुळजापूर विधानसभा मतदार संघात झालेल्या 6 हजार 95 बोगस मतदार अर्ज नोंदणी प्रकरणी धाराशिव जिल्हाधिकारी तथा निवडणुक निर्णय अधिकारी कीर्ती किरण पुजार यांनी राज्य निवडणुक आयुक्ताकडे लेखी अहवाल सादर केला आहे. निवडणुक विभागाने सर्व प्रक्रिया वेळीच करत गुन्हा नोंद केला आहे, उपविभागीय पोलिस अधिकारी डॉ निलेश देशमुख हे तपास करीत असुन तपास सुरु आहे, त्यांच्याकडून अहवाल आला की कळवू असे त्या अहवालात म्हणटले आहे. यात कोण सहभागी आहे हे मोबाईल नंबर, आयपी ऍड्रेस आधारे तपासावे असे जिल्हाधिकारी म्हणाले.
बोगस अर्ज नोंदणी प्रकरणी जिल्हा निवडणुक विभागाकडे शिवसेनेचे तालुकाप्रमुख अमोल जाधव यांची तक्रार आल्यावर त्याची चौकशी केली. जिल्हाधिकारी डॉ सचिन ओम्बसे यांच्या आदेशाने चावडी वाचन करून बोगस अर्ज ऑनलाईन केल्याचे लक्षात आल्यावर ते अर्ज रिजेक्ट/नाकारण्यात आले त्यानंतर सहाय्यक निवडणूक निर्णय अधिकारी अरविंद बोळंगे यांनी पोलिसात गुन्हा नोंद केला. चावडी वाचन करून बोगस अर्ज नोंदणी केलेल्या 294 बूथ व त्यातील 6 हजार 95 नावाची यादी अहवालासोबत जोडली आहे. ही सगळी नावे, कागदपत्रे, पुरावे निवडणुक विभागाने पोलिसांना तपासासाठी दिली आहेत.
बोगस आधारकार्ड, मोबाईल नंबर आधारे 6 हजार पेक्षा अधिक नव मतदार नोंदणी अर्ज करण्यात आले. बोगस मतदार नोंदणी करण्याचा प्रयत्न निवडणुक आयोगाने मतदार याद्यांचे चावडी वाचन करून हाणून पाडला. खुद्द निवडणुक आयोगाने फसवणूक व तोतयेगिरी केल्याप्रकरणी गुन्हा नोंद करून 10 महिने उलटले तरी तपास न झाल्याने खासदार ओमराजे निंबाळकर यांनी काही प्रश्न उपस्थितीत केले आहे. ओमराजे यांनी केंद्रीय व राज्य निवडणुक आयोगाकडे याबाबत तक्रार केली त्यानंतर जिल्हाधिकारी यांनी आयोगाला लेखी अहवाल पाठवला आहे.
धाराशिव जिल्ह्यातील तुळजापूर पोलीस स्टेशनमध्ये सहाय्यक निवडणुक निर्णय अधिकारी अरविंद बोळंगे यांनी 17 ऑक्टोबर 2024 रोजी 476/ 2024 ला बोगस आधार कार्ड, फोटो, नावे व कागदपत्रे जोडून बोगस मतदार नोंदणी अर्ज दाखल केल्या प्रकरणी गुन्हा नोंद केला. 2 ऑक्टोबर ते 16 ऑक्टोबर या काळात ‘व्होटर हेल्पलाईन’ या अँपच्या माध्यमातुन जवळपास 6 हजार 95 पेक्षा अधिकची नावे फॉर्म नंबर 6 भरून नाव नोंदणी करण्यात आली. एका लॉगिनवरून जास्तीत जास्त 5 अर्ज ऑनलाईन भरता येतात म्हणजे जवळपास दीड हजार सिमकार्ड वापरण्यात आले त्यातुन एकाही व्यक्तीपर्यंत पोलिसांना पोहचता आले नाही.
हंगरगा गावात जे बोगस आधारकार्ड नामांकन क्रमांक वापरले गेले आहेत तेच क्रमांक सर्वत्र वापरले गेले. आधार कार्डवर डिजीटल सहीमध्ये दिनांक व वेळ एकसमान असल्याचे आढळून आले. तत्कालीन निवडणूक निर्णय अधिकारी डॉ सचिन ओम्बासे यांच्या आदेशानंतर तुळजापूर विधानसभा मतदार संघाचे सहायक मतदार नोंदणी अधिकारी तथा तहसीलदार अरविंद बोळंगे यांनी दिलेल्या तक्रारीवरून भारतीय न्यायसंहिता 2023 कलम 172,3(5),318(2),335,336(2),336(3),340(2)61(2) व 62 अन्वये गुन्हा नोंद करण्यात आला.
