6 हजार बोगस मतदार नाव नोंदणी अर्ज प्रकरण – लोकशाहीला काळिमा, आयोगाची फसवणुक, 10 महिने उलटले तरी तपास ठप्प
धाराशिव – समय सारथी
मतदार नोंदणी व प्रक्रियेवरून देशभरात केंद्रीय निवडणुक आयोगावर टीका होत असतानाच धाराशिव जिल्ह्यातील तुळजापूर विधानसभा मतदार संघात बोगस मतदार नोंदणीचा प्रयत्न करण्यात आला, याप्रकरणी गुन्हा नोंद होऊन जवळपास 10 महिने उलटून गेले असले तरी विशेष काही प्रगती झालेली दिसत नाही. थेट निवडणुक आयोगाला आव्हान देणारे हे ‘कांड’ असुन इतके महिने तपास न होणे दुर्दैवी आहे. या गुन्ह्यांची स्वतंत्र यंत्रणा मार्फत चौकशी होणे गरजेचे असुन याची तक्रार केंद्रीय व राज्य अश्या दोन्ही निवडणुक आयोगाकडे करणार असल्याचे खासदार ओमराजे निंबाळकर म्हणाले.
आधारकार्ड, मोबाईल नंबर आधारे नव मतदार नोंदणी करण्याचा प्रयत्न मतदार याद्यांचे चावडी वाचन करून निवडणुक आयोगाने हाणून पाडला होता मात्र या प्रकरणाचा ‘मास्टर माईंड’ कोण हे अद्याप समोर आले नाही. लोकशाहीला ‘काळिमा’ फसणारा हा प्रकार देशद्रोहासारखा आहे, निवडणुक आयोग याची दखल घेऊन असे प्रकार करणारा शोधणारा का हे पाहावे लागेल.
‘व्होटर हेल्पलाईन’ या अँपच्या माध्यमातुन जवळपास 6 हजार 200 पेक्षा अधिकची नावे फॉर्म नंबर 6 भरून नाव नोंदणी करण्यात आली मात्र त्यातील बोगसपणा उघड झाल्यावर हे अर्ज नाकारण्यात आले. शिवसेनेचे तुळजापूर तालुकाप्रमुख अमोल शिवाजीराव जाधव यांनी तक्रार केल्यानंतर हा सगळा प्रकार उघड झाला तर दैनिक समय सारथीने पाठपुरावा केल्यानंतर व्याप्ती लक्षात घेऊन आयोगाने गुन्हा नोंद केला.
2 ऑक्टोबर ते 16 ऑक्टोबर या काळात व्होटर अँपचा वापर करून मोठ्या प्रमाणात मतदार नाव नोंदणी करण्यासाठी अर्जाची नोंदणी करण्यात आली. हे अर्ज दाखल करताना बोगस अस्तित्वात नसलेले आधार कार्ड वापरण्यात आले, मोबाईल नंबर, फोटो व पत्ते वापरून वेगवेगळ्या गावात अर्ज दाखल करण्यात आले, ते अर्ज बीएलओ स्तरावर मंजुरीसाठी प्रलंबित होते मात्र प्रशासन वेळीच सतर्क झाल्याने बोगस मतदार नोंदणीचा डाव हाणून पाडला गेला आहे.
एका लॉगिनवरून जास्तीत जास्त 5 अर्ज ऑनलाईन भरता येतात म्हणजे जवळपास दीड हजार सिमकार्ड वापरण्यात आले त्यातुन एकाही व्यक्तीपर्यंत पोलिसांना पोहचता आले नाही. जवळपास 100 मतदार केंद्रावर हे ‘कांड’ झाले असुन कनेक्शन सेम आहे. आधार एनरॉलमेंट नंबर सारखेच आहेत. हंगरगा गावात जे बोगस आधारकार्ड नामांकन क्रमांक वापरले गेले आहेत तेच क्रमांक सर्वत्र वापरले गेले. आधार कार्डवर डिजीटल सहीमध्ये दिनांक व वेळ एकसमान असल्याचे आढळून आले, अर्ज भरताना कॉलेजच्या विद्यार्थी व विद्यार्थिनी,ज्येष्ठ नागरिक यांचे फोटो वापरण्यात आले असुन त्यांच्या आधार कार्डवर स्थानिक गावचा पत्ता दाखवला होता.
तुळजापूर विधानसभा मतदार संघातील हंगरगा गावातील बोगस नव मतदार अर्ज नोंदणी प्रकरणात 40 जणांवर तत्कालीन निवडणूक निर्णय अधिकारी डॉ सचिन ओम्बासे यांच्या आदेशानंतर गुन्हा नोंद करण्यात आला. तुळजापूर विधानसभा मतदार संघाचे सहायक मतदार नोंदणी अधिकारी तथा तहसीलदार अरविंद बोळंगे यांनी दिलेल्या तक्रारीवरून सायबर पोलिस ठाण्यात भारतीय न्यायसंहिता 2023 कलम 172,3(5),318(2),335,336(2),336(3),340(2)61(2) व 62 अन्वये गुन्हा नोंद करून तो तपासासाठी तुळजापूर पोलीसाकडे वर्ग करण्यात आला.
