धाराशिव – समय सारथी
तुळजापूर विधानसभा मतदार संघात बोगस आधारकार्ड, मोबाईल नंबर आधारे नव मतदार नोंदणी करण्याचा प्रयत्न निवडणुक आयोगाने हाणून पाडला होता मात्र या प्रकरणाचा ‘मास्टर माईंड’ कोण हे अद्याप समोर आले नाही. गुन्हा नोंद होऊन जवळपास 10 महिने उलटून गेले असले तरी तपासात विशेष काही प्रगती झालेली दिसत नाही. पोलिस व तहसील (निवडणुक विभाग) यांच्यात ‘पत्रव्यवहार’ सुरु आहे.
‘व्होटर हेल्पलाईन’ या अँपच्या माध्यमातुन जवळपास 6 हजार 200 पेक्षा अधिकची नावे फॉर्म नंबर 6 भरून नाव नोंदणी करण्यात आली मात्र वेळीच हा प्रकार लक्षात आल्याने ‘डाव’ फसला. निवडणुकीत तोतयेगिरी करण्याचा प्रयत्न करून केंद्रीय निवडणुक आयोगाची फसवणुक केल्याचे फिर्यादीत म्हणटले आहे मात्र या प्रकरणात प्रशासन व आयोग गंभीर नसल्याचे दिसुन येत आहे. गुन्हा नोंद करून सोपस्कार पुर्ण करण्यात आले आहेत.
शिवसेनेचे तुळजापूर तालुकाप्रमुख अमोल शिवाजीराव जाधव यांनी तक्रार केल्यानंतर हा सगळा प्रकार उघड झाला तर दैनिक समय सारथीने पाठपुरावा केल्यानंतर व्याप्ती लक्षात घेऊन आयोगाने गुन्हा नोंद केला. मतदार याद्याच्या ‘चावडी वाचना’त एकट्या तुळजापूर मतदार संघातच याची मोठी गंभीरता दिसुन आली.
2 ऑक्टोबर ते 16 ऑक्टोबर या काळात व्होटर अँपचा वापर करून मोठ्या प्रमाणात मतदार नाव नोंदणी करण्यासाठी अर्जाची नोंदणी करण्यात आली. हे अर्ज दाखल करताना बोगस अस्तित्वात नसलेले आधार कार्ड वापरण्यात आले, मोबाईल नंबर, फोटो व पत्ते वापरून वेगवेगळ्या गावात अर्ज दाखल करण्यात आले, ते अर्ज बीएलओ स्तरावर मंजुरीसाठी प्रलंबित होते मात्र प्रशासन वेळीच सतर्क झाल्याने बोगस मतदार नोंदणीचा डाव हाणून पाडला गेला आहे. संघटीत गुन्हेगारी सारखा हा प्रकार असुन याचा ‘मास्टर माईंड’ शोधणे गरजेचे आहे.
विशेष म्हणजे बोगस नोंदणी झालेले पैकी काहीजण परप्रांतीय असल्याचे आडनावावरून दिसून येत आहे.सत्यपाल, कपूर,अय्यर,खंडेलवाल अशी नावे आहेत. हंगरगा येथील दाखल गुन्ह्यात व नंतर चावडी वाचनात समोर आलेली जवळपास 6 हजार 200 अर्ज, कागदपत्रे निवडणुक आयोगाने पोलिसांकडे तपासासाठी दिली आहेत.एका लॉगिनवरून जास्तीत जास्त 5 अर्ज ऑनलाईन भरता येतात म्हणजे जवळपास दीड हजार सिमकार्ड वापरण्यात आले त्यातुन एकाही व्यक्तीपर्यंत पोलिसांना पोहचता आले नाही.
तुळजापूर मतदार संघातील जवळपास 100 पेक्षा अधिक मतदान केंद्रावर बोगस अर्ज नोंदणीचे प्रकार चावडी वाचन वेळी समोर आले. हंगरगा, रुईभर व सिंदफळ, काटीसह इतर गावातील कनेक्शन सेम असुन आधार एनरॉलमेंट नंबर सारखेच आहेत. हंगरगा गावात जे बोगस आधारकार्ड नामांकन क्रमांक वापरले गेले आहेत तेच क्रमांक सिंदफळ, रुईभर, काटी व इतर गावात वापरण्यात आले आहेत त्यामुळे या ठिकाणसह अन्य भागात एक मोठे रॅकेट असल्याच्या बाबीला पुष्टी मिळाली आहे.
सिंदफळ, रुईभर व इतर 100 ठिकाणी वापरण्यात आलेले आधार कार्डचे नंबर अस्तित्वात नसुन सगळ्यांची वेळ व नंबर एकच आहे.आधार कार्डवर डिजीटल सहीमध्ये दिनांक व वेळ एकसमान असल्याचे आढळून आले, अर्ज भरताना कॉलेजच्या विद्यार्थी व विद्यार्थिनी,ज्येष्ठ नागरिक यांचे फोटो वापरण्यात आले असुन त्यांच्या आधार कार्डवर स्थानिक गावचा पत्ता दाखवला होता, जो की चुकीचा असुन ते स्थानिक रहिवासी नाहीत. बीएलओ व त्यांची टीमने पाहणी केल्यावर ते पत्त्यावर राहत नसल्याने निवडणुक आयोगाने अर्ज नामंजूर केले.
तुळजापूर विधानसभा मतदार संघातील हंगरगा गावातील बोगस नव मतदार अर्ज नोंदणी प्रकरणात 40 जणांवर तत्कालीन निवडणूक निर्णय अधिकारी डॉ सचिन ओम्बासे यांच्या आदेशानंतर गुन्हा नोंद करण्यात आला. तुळजापूर विधानसभा मतदार संघाचे सहायक मतदार नोंदणी अधिकारी तथा तहसीलदार अरविंद बोळंगे यांनी दिलेल्या तक्रारीवरून सायबर पोलिस ठाण्यात भारतीय न्यायसंहिता 2023 कलम 172,3(5),318(2),335,336(2),336(3),340(2)61(2) व 62 अन्वये गुन्हा नोंद करून तो तपासासाठी तुळजापूर पोलीसाकडे वर्ग करण्यात आला.
