धाराशिव – समय सारथी
बार्शी येथील ड्रग्ज तस्करीचे धागेदोरे थेट मुंबईपर्यंत पोहचले असल्याचे पोलिस तपासात समोर आले असुन पोलिसांनी आणखी 4 आरोपींची नावे तपासात निष्पन्न केली आहेत, हे चारही आरोपी परंडा शहरातील असुन त्यातील हसन चाऊस याला अटक केली आहे तर 3 जन फरार झाले आहेत. ड्रग्ज तस्करीतील आरोपींची संख्या 10 झाली असुन त्यातील 8 जन परंडा येथील आहेत तर 2 जन हे बार्शी येथील आहेत. 10 पैकी 7 जन अटक असुन 3 जन फरार आहेत, त्यातील 6 आरोपींची वाढीव पोलिस कोठडी 24 एप्रिल रोजी संपणार असल्याने त्यांना बार्शी कोर्टात हजर केले जाणार आहे. तस्करीच्या या रॅकेटमध्ये आणखी आरोपी वाढणार असल्याची पोलिस सूत्रांची माहिती आहे.
परंडा येथील असद हसन देहलुज, मेहफुज महंमद शेख, वसिम इसाक बेग व जावेद नवाबमुद्दीन मुजावर या 4 आरोपीसह बार्शी येथील जमीर अन्सार पटेल व सिरफराज उर्फ गोल्डी अस्लम शेख या 2 जणांचा समावेश आहे, यांची पोलिस कोठडी 24 एप्रिलला संपणार आहे. 20 ग्रॅम वजनाचे 10 पुड्यासह पोलिसांनी 18 एप्रिल रोजी 3 जणांना अटक केली होती त्यानंतर 3 जणांना अटक केली. असद देहलूजकडे 9.19 ग्रॅम ड्रग्ज 5 पुड्या व पिस्टल, मेहफुज शेख कडे 5.73 ग्रॅम ड्रग्ज 2 पुड्या व सरफराज उर्फ गोल्डी कडे 5.12 ग्रॅम 3 पुड्या असे 20 ग्रॅम ड्रग्ज जप्त केले.
ड्रग्ज कुठून आणले होते व कोणाला दिले जाणार होते, पुरवठादार कोण? गावठी पिस्टल कोणाकडुन आणले त्याचा वापर इतर गुन्ह्यात झाला का? आरोपीचे मोबाईल, कॉल डिटेल, सोशल मीडिया यासह अन्य बाबी तपास, अमली पदार्थ व शस्त्र विक्रीचा व्यवहार, इतर साथीदार याचा तपास पोलिस करीत आहेत. पोलीस अधीक्षक अतुल कुलकर्णी, अपर पोलीस अधीक्षक प्रीतम यावलकर, उपविभागीय पोलीस अधिकारी जालिंदर नाकुल व पोलीस निरीक्षक बालाजी कुकडे यांच्या मार्गदर्शनाखाली पोलीस उपनिरीक्षक उमाकांत कुंजीर व त्यांच्या पथकाने ही कारवाई केली.
