5 कोटी बँकेत,पाव किलो सोने व 30 लाखांचा मुद्देमाल जप्त – ‘ते’4 जण कोण? 15 दिवस उलटले
धाराशिव – समय सारथी
तुळजापूर ड्रग्ज प्रकरणात संकेत शिंदे या आरोपीला धाराशिव कोर्टाने न्यायालयीन कोठडी सुनावत त्याची धाराशिव जेलमध्ये रवानगी केली आहे. आरोपी संकेत शिंदे,सयाजी चव्हाण, सुमित शिंदे, ऋतूराज गाडे या 4 जणांना पोलिसांनी 4 मार्च रोजी 18 ग्रॅम वजन असलेल्या 30 पुड्या ड्रग्जसह अटक केली होती. ड्रग्ज प्रकरणात 16 आरोपी असुन त्यातील अटक सर्वच्या सर्व 10 जण जेलमध्ये आहेत तर तुळजापूर येथील पिनू तेलंग व मुंबई येथील वैभव गोळे हे 2 जण फरार आहेत. 4 नावे पोलिसांनी गोपनीय ठेवत ती डायरीत नमुद केली आहेत. पोलिसांनी आजवर 30 लाख रुपयांचा मुद्देमाल जप्त केला असुन त्यात ड्रग्ज, मोबाईल, पाव किलो सोने समाविष्ट आहे, त्या व्यतिरिक्त संगीता हिच्या खात्यावर 5 कोटी सापडले आहेत. पोलिसांनी 4 आरोपींची नावे 1 मार्च रोजी कोर्टात दिली असुन त्यांना अटक करण्यात यश आलेले नाही. 4 मार्च नंतर एकाही नवीन आरोपीस अटक करण्यात आले नाही किंवा नवीन नाव निष्पन्न झाले नाही.
तुळजापूर येथील आरोपीचे मुंबई येथील ड्रग्ज तस्कर गोळे, खोत व इतरांशी यांच्याशी संबंध असल्याचे तपासात निष्पन्न झाले असुन बँक खाते व्यवहार व आरोपीचे संभाषण पोलिसांनी हस्तगत केले आहे, त्यामुळे यात अनेक बाबींचा खुलासा झाला आहे. हे आरोपी मुंबई सोबतच सोलापूर येथील ड्रग्ज तस्कर यांच्याकडुन ड्रग्ज खरेदी करीत असल्याचे समोर आले असुन सोलापूर लिंकमधील काही नावे निष्पन्न झाली आहेत. ड्रग्ज तस्करीचे 2 वेगवेगळे सिंडीकेट तुळजापुरात सक्रीय असुन पहिल्या घटनेत पोलिसांनी मुंबई कनेक्शन उघड करीत 14 फेब्रुवारी रोजी 45 ग्रॅम ड्रग्ज असलेल्या 59 पुड्या जप्त केल्या यात पोलिसांनी सुरुवातीला 3 आरोपीना अटक केली आहे तर मुंबई कनेक्शनचा तपास करताना गोपनीय खबऱ्यामार्फत माहिती मिळाल्यावरून 4 मार्च रोजी तुळजापुरात 2 ठिकाणावरून 18 ग्रॅम ड्रग्ज असलेल्या 30 पुड्या जप्त केल्या व 4 आरोपीना अटक केली.
तुळजापूर येथील अमित उर्फ चिमू अशोकराव आरगडे व युवराज देविदास दळवी आणि नळदुर्ग येथील संदीप संजय राठोड या 3 आरोपीना प्रथम ड्रग्जसह 14 फेब्रुवारीला तामलवाडी येथे रंगेहात अटक करण्यात आली. त्यानंतर या 3 आरोपीना ड्रग्ज पुरवठा करणारी मुंबई महिला तस्कर संगीता गोळेला 22 फेब्रुवारी,संतोष खोतला 27 फेब्रुवारी,तुळजापूर तालुक्यातील सराटी येथील विश्वनाथ उर्फ पिंटू मुळे याला 28 फेब्रुवारीला अटक करण्यात आली. यातील अरगडे, दळवी, राठोड, संगीता गोळे, संतोष खोत, पिंटू मुळे, सयाजी चव्हाण, सुमित शिंदे, ऋतूराज गाडे, संकेत शिंदे हे 10 जण जेलमध्ये आहेत. स्वराज उर्फ पिंटू तेलंग व वैभव मुळे हे 2 आरोपी फरार आहेत. सोलापूरहुन ड्रग्ज खरेदी करणारे सयाजी चव्हाण, सुमित शिंदे, ऋतूराज गाडे व संकेत शिंदे या 4 जणांना ड्रग्जसह 4 मार्च रोजी अटक करण्यात आली.
पालकमंत्री प्रतापराव सरनाईक यांनी ठोस भुमिका स्पष्ट करीत ड्रग्ज तस्करावर कारवाई करण्याचे आदेश दिले. पोलिस अधीक्षक संजय जाधव व तत्कालीन अपर पोलीस अधीक्षक गौहर हसन, उपविभागीय अधिकारी डॉ निलेश देशमुख हे स्वतः यावर लक्ष ठेवुन आहेत. जिल्हा सरकारी वकील ऍड महेंद्र देशमुख हे सरकारच्या वतीने कोर्टात सक्षम बाजु मांडत आहेत. तामलवाडी पोलिस निरीक्षक गोकुळ ठाकुर हे दिवसरात्र तपास करीत आहेत.
