धाराशिव – समय सारथी
ड्रग्ज तस्करी व अवैध प्रकारांवर कारवाईचा बडगा उगारला जात असतानाच गुंडाची दहशत कायम असल्याचे एका घटनेवरून समोर आले आहे. तुळजापूरमध्ये एका गावगुंडाने सामाजिक कार्यकर्ते राजाभाऊ माने व त्यांचा अंगरक्षक असलेल्या पोलिस इंगळे यांना धक्काबुक्की करीत मारहाण केली, 2 वेळेस झालेल्या मारहानीचा व्हिडीओ सोशल मीडियावर व्हायरल झाला आहे. प्रशांत कांबळे याच्या विरोधात कारवाई करावी अशी मागणी माने यांनी करीत पोलिसात तक्रार दिली आहे. कांबळे यांच्यावर अनेक गंभीर गुन्हे नोंद असुन त्याचे शस्त्रासोबतचे फोटो समाज माध्यमावर असुन दहशत पसरवीत असल्याचा आरोप माने यांनी केला आहे.
1 मार्च रोजी राजाभाऊ माने व त्यांचा पोलिस अंगरक्षक कोळी हे धाराशिव रोडने स्कुटीवर जात असताना प्रशांत दत्तात्रय कांबळे व त्याचा मित्र याने राजाभाऊ माने यांचा रस्ता अडवून अर्वाच्य भाषेत शिवीगाळ केली व आता तुला जगू देणार नाही म्हणून धमकी दिली. त्यानंतर राजाभाऊ माने व त्यांचा पोलिस अंगरक्षक हे तक्रार देण्यासाठी पोलीस स्टेशन येथे गेले असता ठाणे अंमलदार यांच्या दालनात तक्रार देत असताना प्रशांत कांबळे व त्याचा मित्र याने येऊन शिवीगाळ व दंगा करण्यास सुरुवात केली. राजाभाऊ माने यांनी झालेल्या घटनेची फिर्याद देऊनही गुन्हा नोंद केला नाही असा त्यांचा आरोप आहे.
6 मार्च रोजी सायंकाळी राजाभाऊ माने व त्यांचे पोलिस अंगरक्षक इंगळे आंबेडकर चौकातून घरी जात असताना प्रशांत दत्तात्रय कांबळे याने राजाभाऊ माने यांना जबर मारहाण केली व गळा दाबला तसेच पोलिस अंगरक्षक इंगळे हे भांडण सोडवत असताना त्यांनाही प्रशांत दत्तात्रय कांबळे याने मारहाण केली. सदरची घटना सीसीटीव्ही मध्ये चित्रीत झाली आहे तरी देखील पोलीस गुन्हा नोंद करण्यास टाळाटाळ करत आहेत असा माने यांचा आरोप आहे. 1 मार्च रोजी झालेल्या घटनेची दखल पोलीस स्टेशन तुळजापूर यांनी घेतली असती तर 6 मार्च रोजी राजाभाऊ माने व त्यांचा पोलीस अंगरक्षक यांना भर चौकात जबर मारहाण झाली नसती असे माने यांचे म्हणणे आहे.
