मतदार याद्याचे आज चावडी वाचन सुरु – लवकरच चित्र स्पष्ट होणार
धाराशिव – समय सारथी
बोगस मतदार नोंदणी अर्ज दाखल करण्याच्या एक एक घटना दिवसेंदिवस समोर येत असुन तुळजापूर विधानसभा मतदार संघात मोठा घोळ असल्याचे समोर येत आहे. तुळजापूर तालुक्यातील हंगरगा नळ येथे 40, धाराशिव तालुक्यातील रुईभर या गावात 9 नंतर सिंदफळ येथे 13 अर्ज बोगस आधारकार्ड वापरून दाखल केले आहेत. हंगरगा, रुईभर व सिंदफळ येथील कनेक्शन सेम असुन आधार एनरॉलमेंट नंबर सारखेच आहेत. बोगसगिरीमुळे धाराशिव जिल्ह्यातील सर्व 4 विधानसभा मतदार संघात आज चावडी सुरु असुन त्यावर आक्षेप आल्यानंतर चित्र स्पष्ट होणार आहे. सापडलेले अर्ज हे बीएलओ स्तरावर मंजुरीसाठी प्रलंबित आहेत.
हंगरगा गावात जे बोगस आधारकार्ड नामांकन क्रमांक वापरले गेले आहेत तेच क्रमांक सिंदफळ व रुईभर येथे वापरण्यात आले आहेत त्यामुळे या तिन्ही ठिकाणसह अन्य भागात एक मोठे रॅकेट असण्याची शक्यता आहे. सिंदफळं, रुईभर येथे वापरण्यात आलेले आधार कार्डचे नंबर अस्तित्वात नसुन सगळ्यांची वेळ व नंबर एकच आहे. अर्ज भरताना कॉलेजच्या विद्यार्थी व विद्यार्थिनी यांचे फोटो वापरण्यात आले असुन त्यांच्या आधार कार्डवर स्थानिक गावचा पत्ता दाखवला आहे. तुळजापूर मतदार संघात असे प्रकार अनेक गावात झाले असुन एक एक प्रकार समोर येत आहे.
तुळजापूर विधानसभा मतदार संघातील हंगरगा गावात बोगस नव मतदार अर्ज नोंदणी प्रकरणात 40 जणांवर निवडणूक निर्णय अधिकारी डॉ सचिन ओम्बासे यांच्या आदेशानंतर तुळजापूर विधानसभा मतदार संघाचे सहायक मतदार नोंदणी अधिकारी तथा तहसीलदार अरविंद बोळंगे यांनी दिलेल्या तक्रारीवरून गुन्हा नोंद करण्यात आला आहे.त्याचा तपास तुळजापूर पोलीस करीत आहेत. हंगरगा येथे मतदार अर्ज नोंदणी करताना काही अर्जदार यांच्या अर्जासोबत जोडलेल्या आधार कार्डमध्ये नामांकन क्रम म्हणजे इनरॉलमेंट क्रमांक हा एकसारखाच आढळुन आला तसेच आधार कार्डवर डिजीटल सहीमध्ये दिनांक व वेळ एकसमान असल्याचे आढळून आले, हंगरगा येथील नंबर रुईभर व सिंदफळ येथे वापरण्यात आले आहेत.
धाराशिव जिल्ह्यात आज 20 ऑक्टोबर रोजी रविवारी सर्व 4 ही विधानसभा मतदार संघातील गावात मतदार याद्याचे चावडी वाचन सुरु आहे. लोकसभा निवडणुकीनंतर ज्या नावांची नोंदणी करण्यात आली आहे त्या सर्व नावाची व सोबत जोडलेल्या कागदपत्रे तसेच जे अर्ज बीएलओ यांनी नामंजुर केले त्या सोबत जोडलेल्या कागदपत्रे यांची पुन्हा एकदा तपासणी जिल्हाधिकारी तथा निवडणुक निर्णय अधिकारी डॉ सचिन ओम्बासे यांच्या आदेशाने सुरु असुन त्याची अंतीम आकडेवारी आज अपेक्षित आहे. तुळजापूर विधानसभा मतदार संघात जे अर्ज नामंजूर करण्यात आले त्या किती बोगसगिरी झाली होती ते यामुळे स्पष्ट होणार आहे.
मतदार याद्याचे चावडी वाचन गावात केले जात असुन त्यावेळी काही आक्षेप आले तर त्याची सुनावणी घेऊन नावे मतदार यादीतून कमी करण्यात येणार आहेत. चावडी वाचन वेळी गावात लोकांनी, राजकीय पक्षाच्या प्रतिनिधी यांनी हजर राहावे व काही आक्षेप असल्यास नोंदवावेत. कुठे बोगस अर्ज नोंदणी किंवा मतदार नोंदणी झाल्याची माहिती, तक्रार असल्यास लेखी तक्रार जिल्हा प्रशासनाकडे करावी असे आवाहन जिल्हाधिकारी डॉ ओम्बासे यांनी केले आहे.
