धाराशिव – समय सारथी
तुळजापूर यात्रा मैदान जागा प्रकरणी दाखल चौकशी अहवालानुसार कारवाईची दिशा व जबाबदारी निश्चित करण्यासाठी 23 सप्टेंबरला बैठक होणार आहे. पदाचा गैरवापर करून व नगर परिषदेवर दबाव टाकून कारवाई होऊ दिली नाही असा आरोप माजी उपनगराध्यक्ष पंडीत जगदाळे यांच्यासह अन्य जणांवर तक्रारदार यांनी केला आहे.
रेखाकन नकाशे, अकृषी व बांधकाम परवाने, खरेदी विक्री खत करणारे तत्कालीन नगर परिषद, भुमी अभिलेख, मुद्रांक विभागातील अधिकारी, काही बाबींना मंजुरी दिलेले नगर परिषदेतील तत्कालीन पुढारी सुद्धा कारवाईच्या रडारवर आहेत. या बैठकीत कारवाईची दिशा व प्राधान्यक्रम ठरवला जाणार आहेत. 27 वर्षापुर्वीच्या या महाघोटाळ्याला अहवालामुळे वाचा फुटली आहे.
यात्रा मैदान जागा हडप करण्याच्या प्रकरणात कोण कोणते अधिकारी, पदाधिकारी यांनी ‘हातभार’ लावला आता त्यांच्या हातात गुन्हा नोंद झाल्यावर ‘बेड्या’ पडू शकतात. गुन्हा नोंद करण्यासाठी अधिकारी प्राधिकृत करणे, तत्कालीन शासकीय अधिकारी व पदाधिकारी यांची नावे, कार्यकाळ निश्चित करून नावे अंतीम करणे, कोणत्या कलमाखाली गुन्हा नोंद करणे. यात्रा मैदान जागेचा ताबा, झालेले खरेदी विक्री दस्त कोर्टातून रद्द करणे, जागेवर अतिक्रमण असेल तर ते काढुन घेणे यासह अन्य बाबीवर निर्णय होणार आहे. बोगस दस्तासह काही प्रकरण थेट फौजदारी कारवाईशी संबंधित असुन काही बाबी ह्या दिवाणी स्वरूपाच्या आहेत.
चौकशी समितीचा अहवाल येऊन 4 महिने झाले तरी कारवाई नसल्याने पालकमंत्री प्रतापराव सरनाईक यांनी लक्ष घातले असुन कारवाईच्या सुचना दिल्याने गती आली आहे. जिल्हाधिकारी कीर्ती किरण पुजार यांनी अपर जिल्हाधिकारी यांच्या अध्यक्षतेखाली कारवाईसाठी समिती गठीत केली असुन मंगळवारी 23 सप्टेंबर रोजी पहिली बैठक होणार आहे. या समितीत उपविभागीय अधिकारी तथा भुसंपादन अधिकारी सचिव, उपाध्यक्ष उपजिल्हाधिकारी निवडणुक, सदस्य म्हणुन जिल्हा अधीक्षक भुमी अभिलेख, जिल्हा सहनिंबधक, सहाय्यक नगर रचनाकार व उपायुक्त नगर परिषद प्रशासन हे असणार आहेत.
माजी उपनगराध्यक्ष पंडीत जगदाळे, हरिश्चंद्र जगदाळे, गंगाधर चव्हाण यांच्यासह 27 जणांवर बनावट दस्ताऐवज, खोटे निवेदन व शपथपत्र, शासनाचे आर्थिक नुकसान, दिशाभुल व फसवणुक केल्याचा आरोप केला आहे. यात्रा मैदान जागा हडप करून त्या जागेवर बेकायदेशीर बांधकाम, पत्र्याचे गाळे अर्थात अतिक्रमण काढून टाकून जागा पुनःश्च शासनाच्या ताब्यात घेणे, 27 जणांकडुन शासनाच्या नुकसान भरपाईपोटी 39 कोटी वसुल करणे, सदर वसुलीसाठी त्यांची स्थावर व जंगम मालमत्ता जप्त करून बँक खाती गोठवणे, या जागेच्या बाबतीत केलेली सर्व खरेदी खत रद्द करणे व त्यासाठी दिवाणी न्यायालयात शासकीय अभियोकता यांच्या मार्फत दावा दाखल करणे अशी मागणी तक्रारदार नेप्ते व यादव यांनी केली आहे.
तुळजापूर नगर परिषदेने यात्रा मैदानासाठी सर्वे नंबर 138 मधील 2 हेक्टर 63 आर इतकी जमीन संपादीत केली मात्र ती जागा हडप केल्याचे व विक्री केल्याचे चौकशी अहवालातुन समोर आले आहे. तुळजापूर येथील यात्रा मैदान जागा हडप केल्याची तक्रार संभाजी शिवाजीराव नेप्ते व किरण माणिकराव यादव यांनी केली होती, त्यानुसार तहसीलदार अरविंद बोळंगे अध्यक्ष, नगर परिषद मुख्याधिकारी लक्ष्मण कुंभार सचिव व सदस्य मंडळ अधिकारी अमर गांधले, तलाठी अशोक भातभागे यांनी चौकशी अहवाल दिला आहे. शिवसेनेचे तालुका अध्यक्ष अमोल शिवाजीराव जाधव यांनी देखील आवाज उठवत कारवाईसाठी पाठपुरावा सुरु केला आहे.
