धाराशिव – समय सारथी
धाराशिव जिल्ह्यासह, बीड मराठवाड्यात प्रतिबंधित अमली पदार्थ एमडी ड्रग्ज, गांजा, गुटखामुळे तरुण पिढी बरबाद होत असल्याने विक्री करणारी टोळी आणि त्यांच्याशी संबंधित व संगनमत करणाऱ्यावर मकोका अंतर्गत कारवाई करावी या मागणीसाठी भाजप आमदार सुरेश धस हे आक्रमक झाले आहेत. त्यांनी विधीमंडळात पावसाळी अधिवेशनात आवाज उठवण्याचा व हक्कभंग दाखल करण्याचा इशारा दिला आहे. धाराशिव जिल्ह्यात गुटखा तस्करीचे मोठे रॅकेट सक्रीय असुन त्याला राजकीय व प्रशासकीय पाठबळ मिळत आहे.
महाराष्ट्र शासनाने प्रतिबंधित केलेल्या अमली पदार्थ ज्यात ड्रग्ज, गांजा व गुटखा यांची तस्करी हा अत्यंत गंभीर सामाजिक गुन्हा आहे. नळदुर्ग येथे दिनांक 27 मार्च 26 रोजी पोलिसांनी केलेल्या गुटखा कारवाईत 48 लाख रुपयांचा मुद्देमाल जप्त करण्यात आला. ड्रग्ज तस्करीत फरार असलेला आरोपी इंद्रजीतसिंह उर्फ मिटू ठाकूर याने तिथे पोलिसांना धमकावले, ही बाब अत्यंत गंभीर आहे. यातील 3 आरोपी हे बीड जिल्ह्यातील आहेत,संजय सुभाष जगताप ( वानेवाडी ता पाटोदा) सचिन परमेश्वर पवार ( रा.कुसळंब ता पाटोदा ) सतीश तुकाराम सोंडगे ( गवळवाडी ता पाटोदा जि. बीड) या 3 आरोपीना अटक केली,
नळदुर्ग, तुळजापूर येथील ड्रग्ज व गुटखा तस्करी प्रकरणात मकोका लावावा अशी आमदार सुरेश धस यांची मागणी आहे. धस यांनी पोलिस अधीक्षक रितु खोकर यांच्याशी चर्चा केली मात्र कोणतीही ठोस कारवाई केलेली नाही. गुटखा तस्करीत धस यांनी एका संशयित प्रमुख आरोपीचे नावही सांगितले होते परंतु त्याबाबत तत्परता दाखवली नाही. तुळजापूर ड्रग्ज प्रकरणात ठाकुर याला अटक नाही, पुरवणी दोषारोपपत्र कोर्टात दाखल केले नाही, त्याला जाणीवपूर्वक उशीर केला जातो, असा धस यांचा आरोप आहे.
धाराशिव,बीड, जालना, लातूर जिल्ह्यात शाळकरी मुले व तरुण पिढी यांना अमली पदार्थ व तंबाखूजन्य पदार्थ सहज उपलब्ध होत आहेत. त्यामुळे तरुण पिढी नशेच्या आहारी जात आहे. पोलीस प्रशासनाने तातडीने दखल घेणे आवश्यक असताना अद्याप कोणतीही प्रभावी कारवाई झालेली दिसत नाही. चर्चा करूनही कारवाई होत नाही, याबाबत नाराजी व्यक्त केली आहे.
शाळा, महाविद्यालयांजवळ गुटखा विक्री करणाऱ्यांवर त्वरित कारवाई करून तरुण पिढीला संरक्षण देण्यात यावे. एकाच ठिकाणी दीर्घकाळ कार्यरत असलेल्या अधिकारी व कर्मचाऱ्यांची तात्काळ बदली करावी. प्रतिबंधित पदार्थांच्या तस्करीस संरक्षण देणाऱ्या पोलीस कर्मचाऱ्यांवर त्वरित चौकशी करून बडतर्फ करावे. नळदुर्ग येथील तस्करीत काही कर्मचारी आरोपीच्या संपर्कात असु शकतात त्यांची चौकशी करावी अशी मागणी केली आहे.
