हिम्मत असेल तर एसआयटी चौकशी करा – राणाजगजीतसिंहांना आमदार कैलास पाटलांचे आव्हान
धाराशिव – समय सारथी
विकासाच्या गप्पा मारायच्या व दुसरीकडे स्थगिती देऊन व खोडा घालणे हीच तुमची गॅरंटी आहे. तारांकित प्रश्न करून रस्त्याचे मंजुर काम अडविले. जाणीवपूर्वक लोकांची अडचण होऊ दिली याची आधी उत्तरे द्या मगच बोला. हिम्मत असेल तर 140 कोटींच्या रस्ते निविदा कामात एसआयटी चौकशी करा असे आव्हान आमदार कैलास पाटील यांनी आमदार राणाजगजीतसिंह पाटलांना दिले आहे. नगर परिषद प्रचार सभेत ते बोलत होते त्यांनी शिवसेना काँग्रेस महाविकास आघाडीला निवडून द्या असे आवाहन केले.
आमदार राणाजगजीतसिंह पाटील हे बॅनरबाजी करीत असुन त्यात जुना व भविष्यातील फोटो असे दाखवून लोकांना खोटी स्वप्ने दाखवली जात आहेत. हा जो जुना फोटो आहे त्यातील रस्ता जिजाऊ माँ साहेब चौक ते बोरफळ असा मंजुर झालेला आहे. 24 ऑक्टोबर 2024 ला या रस्त्याचे भूमिपूजन चिखली पाटी येथे या डिजिटल वरील लोकांनी केले. गेल्या 13 महिन्यात हे काम का झाले नाही याचे उत्तर त्यांनी जनतेला द्यायला पाहिजे. लोकांची गैरसोय व्हावी व त्याचा रोष शिवसेनेवर यावा यासाठी त्यांनी जाणीवपूर्वक हे काम होऊ दिले नाही, याच रस्त्याचे पुढचे काँक्रेट काम झाले पण शहरातील काम जाणीवपूर्वक होऊ दिले नाही. नगर परिषद आचारसंहिता सुरु झाली ही या रस्त्यावर खड्डे करून त्यात खडी टाकायला सुरुवात केली. तुम्हीच भुमीपूजन केले व काम होऊ दिले नाही.
महाविकास आघाडी सरकार असताना बोंबले हनुमान चौककडे जाणारा रस्ता अडवला. आमदार राणाजगजीतसिंह पाटील यांनी विधीमंडळात तारांकित प्रश्न उपस्थिती केला. धाराशिव शहरात भुयारी गटार योजना मंजुर झाली असुन ते काम आधी करावे व नंतर रस्त्याचे काम करावे असा शासन निर्णय त्याला जोडला. तारांकित प्रश्नामुळे हे काम कार्यादेश देऊनही होऊ शकले नाही.
नेहमी म्हणता विरोधकांनी विकासावर बोला असे म्हणता आम्ही तेच विचारतो की 13 महिने काम का झाले नाही. तारांकीत प्रश्न का उपस्थितीत केला याचे उत्तर द्या. शहरात एकही उद्यान नाही, महाविकास आघाडी सरकार असताना 3 उद्यानसाठी 7 कोटी मंजुर केले मात्र त्याला स्थगिती का दिली आणि आता सांगता 25 कोटीतुन उद्यान करू. काम करायचे लांबच मात्र आलेल्या कामाला खोडा घालणे हीच तुमची गॅरंटी आहे, त्यामुळे विकासाच्या गप्पा मारायचा अधिकार तुम्हाला नाही, आधी स्थगिती का दिली याचे उत्तर द्यायचे.
140 कोटी रस्ते कामाची निविदा प्रशासकावर दबाव टाकून होऊ दिली नाही, ठेकेदार याच्या हितासाठी हे सगळं करण्यात आले त्याला 22 कोटींचा लाभ मिळावा म्हणुन हे केले असा आरोप आमदार पाटील यांनी केला. नगर परिषदेच्या अधिकारी याची नार्को करा, सरकारमध्ये हिम्मत असेल तर 20 महिने उशीर का झाला यासाठी एसआयटी नेमावी असे ते म्हणाले. आम्ही आंदोलन केले, विधानसभामध्ये आवाज उठवला मात्र चौकशी होऊ नये यासाठी कोणाचा दबाव होता. विकासाच्या गप्पा मारायच्या व प्रत्येक कामात खोडा घालायचा व नंतर मोठी स्वप्ने दाखवायची हेचं आजपर्यंत सुरु आहे.
हातलादेवी परिसरातील खानापुर येथे तरंगते करंजे उभे करण्याच्या नावावर जिल्हा परिषदेतून 75 लाख खर्च केले, 1 महिन्यात कारंजे केले व बिल उचलले हे पैसे कोणाच्या घशात गेले. विकास शोधायचा असेल तर तिथे जा, अश्या भुलथापाना बळी पडू नका, त्यांना मते मागण्याचा अधिकार नाही, असे आमदार पाटील म्हणाले. आठवडी बाजारसाठी 10 कोटी मंजुर केले मात्र सरकार आल्यावर स्थगिती दिली. तुळजाभवानी स्टेडियममध्ये सिंथेटीक ट्रॅक मंजुर झाला मात्र ते काम थांबले, स्वतःच्या बगल बच्च्याला काम नाही मिळाले की थांबवायचे टेंडर मिळाले तर माझ्या माणसाला नाही तर कोणाला नाही. याची उत्तर द्या असे आव्हान दिले.2021 ला मुदत संपल्यावर जर ही निवडणुक झाली असती तर तत्कालीन नगराध्यक्ष मकरंद उर्फ नंदू राजेनिंबाळकर यांच्या कामाचे मूल्यमापन झाले असते, गेली 4 वर्ष एककेंद्री सत्ता राहावी यासाठी भाजपने निवडणुक होऊ दिली नाही, सर्वोच्च न्यायालयाने सांगितल्यावर ह्या निवडणुका होत आहेत असे आमदार पाटील म्हणाले.
सोमनाथ गुरव यांनी जनतेसाठी काम केले असुन त्यांनी लोकांची अनेक प्रश्न मार्गी लावले असुन आंदोलन करून वंचित घटकांना न्याय देण्याचे काम केले आहे. 140 कोटी रस्ते, जिल्हा नियोजन समिती विकास कामांना स्थगिती यासह पाणी व वीज प्रश्न त्यांनी हातात घेत आंदोलन केले. ही सर्व कामे त्यांनी केली आहेत, सामान्य कुटुंबातील ते कार्यकर्ते असुन त्यांना पक्षाने संधी दिली आहे, भाजपात घराणेशाहीला थारा आहे मात्र आम्ही सामान्य शिवसैनिकला संधी दिली, हे फक्त शिवसेनेत होऊ शकते. कामाला येणारा उमेदवार कोण हे लोकांनी पाहिले पाहिजे. उमेदवार याचे कर्तृत्व व काम लोकांनी पाहावे व महायुतीच्या सर्व उमेदवार यांना निवडून द्यावे असे आवाहन आमदार कैलास पाटील यांनी केले.
