आर्थिक व्यवहार, ऑडियो रेकॉर्डिंग व इतर पुरावे सापडले
धाराशिव – समय सारथी
तुळजापूर येथील ड्रग्ज तस्करी प्रकरणातील सर्वच्या सर्व 14 आरोपी धाराशिव येथील कारागृहात असुन गजानन हंगरगेकर या आरोपीची पोलीस कोठडी संपल्यावर त्याची रवानगी न्यायालयीन कोठडीत करण्यात आली. अटक केलेल्या आरोपीकडुन तपासात त्याचे ड्रग्ज तस्करासोबत झालेले आर्थिक व्यवहार, ऑडियो रेकॉर्डिंग सापडले असुन त्याचे आवाजाचे नमुने घेण्यात आले आहेत तसेच कॉल डिटेल व इतर पुरावे जोडले गेले आहेत. ड्रग्ज तस्करी प्रकरणात 35 पैकी 21 आरोपी फरार असुन पोलीस त्यांचा शोध घेत आहेत, जवळपास 80 जणांना नोटीसा पाठवण्यात आल्या असुन त्यांचे जबाब नोंदविणे झाले आहे, त्यावर निर्णयाची प्रक्रिया सुरु आहे. यात काही साक्षीदार तर काही जन आरोपी होणार असल्याचे कळते.
माजी नगराध्यक्ष चंद्रकांत उर्फ बापु कणे, विनोद उर्फ पिटू विलास गंगणे, माजी सभापती शरद जमदडे,तस्कर इंद्रजीतसिंग उर्फ मिटू रणजीतसिंह ठाकुर,प्रसाद उर्फ गोटन कदम परमेश्वर, उदय शेटे, आबासाहेब गणराज पवार, अलोक शिंदे,अभिजीत गव्हाड, मुंबई येथील संतोष खोत व तुळजापूर येथील स्वराज उर्फ पिनू तेलंग, विनायक इंगळे,शाम भोसले,संदीप टोले,जगदीश पाटील,विशाल सोंजी, अभिजीत अमृतराव,दुर्गेश पवार,रणजित पाटील,नाना खुराडे व सोलापुर जिल्ह्यातील उपळाई येथील अर्जुन हजारे हे सर्व 21 आरोपी फरार असुन पोलिस त्यांचा शोध घेत आहेत.
धाराशिव कारागृहात 14 आरोपी असुन त्यात अमित उर्फ चिमू आरगडे,युवराज दळवी, संदीप राठोड, संगीता गोळे, संतोष खोत, विश्वनाथ उर्फ पिंटू मुळे, सयाजी चव्हाण, सुमित शिंदे, ऋतूराज गाडे, संकेत शिंदे, पुणे येथील सुल्तान उर्फ टिपू शेख, सोलापूर येथील जीवन साळुंके, राहुल कदम – परमेश्वर व गजानन हंगरगेकर यांचा समावेश आहे.
तुळजापूर येथील अमित उर्फ चिमू अशोकराव आरगडे व युवराज देविदास दळवी आणि नळदुर्ग येथील संदीप संजय राठोड या 3 आरोपीना 45 ग्रॅम ड्रग्ज असलेल्या 59 पुड्या ड्रग्जसह 14 फेब्रुवारीला तामलवाडी येथे रंगेहात अटक करण्यात आली. त्यानंतर या 3 आरोपीना ड्रग्ज पुरवठा करणारी मुंबई महिला तस्कर संगीता गोळेला 22 फेब्रुवारी अटक केली तीच्या एका बँकेच्या खात्यावर 5 कोटी व घरातुन पाव किलो सोने जप्त केले. संतोष खोतला 27 फेब्रुवारी,तुळजापूर तालुक्यातील सराटी येथील विश्वनाथ उर्फ पिंटू मुळे याला 28 फेब्रुवारीला अटक करण्यात आली. सोलापूरहुन ड्रग्ज खरेदी करणारे सयाजी चव्हाण, सुमित शिंदे, ऋतूराज गाडे व संकेत शिंदे या 4 जणांना 18 ग्रॅम ड्रग्ज असलेल्या 30 पुड्या ड्रग्जसह 4 मार्च रोजी अटक करण्यात आली. पुणे येथील सुल्तान उर्फ टिपू शेख व सोलापूर येथील जीवन साळुंके या दोघांना 23 मार्चला, राहुल कदम-परमेश्वर याला 24 मार्चला अटक केली त्या दिवशी 4 गोपनीय व नवीन 6 अशी 10 जणांची नावे उघड केली. गजानन हंगरकर याला 25 मार्चला अटक केली त्यानंतर पोलिसांनी कोर्टात 26 मार्चला नवीन 10 आरोपींची नावे जाहीर केली.
पोलिस अधीक्षक संजय जाधव व अपर पोलीस अधीक्षक शफकत आमना मॅडम, तत्कालीन अपर पोलिस अधीक्षक गौहर हसन, उपविभागीय अधिकारी डॉ निलेश देशमुख हे स्वतः यावर लक्ष ठेवुन आहेत. जिल्हा सरकारी वकील ऍड महेंद्र देशमुख हे सरकारच्या वतीने कोर्टात सक्षम बाजु मांडत आहेत. तामलवाडी पोलिस निरीक्षक गोकुळ ठाकुर हे तपास करीत आहेत. या सर्व टीमच्या तपासामुळे रॅकेटचा भांडाफोड झाला.ड्रग्ज तस्करीत पोलिसांनी 3 वेळेस पोलिसांनी ड्रग्ज जप्त केले, त्यात 63 ग्रॅम वजनाच्या 89 पुड्या होत्या.
