धाराशिव – समय सारथी
कुळाचे नाव कमी करण्यासाठी 5 हजार रुपये लाचेची मागणी करुन 4 हजार रुपये स्वीकारताना एका तलाठी व खासगी लिपिकास धाराशिव येथील लाचलुचपत विभागाने रंगेहात अटक केली आहे. धाराशिव तालुक्यातील वाघोली गाव सज्जाचे तलाठी भुषण वशिष्ट चोबे व खासगी लिपीक भारत शंकर मगर यांना अटक केली आहे.
यातील तक्रारदार यांचे वडिलांचे नावे असलेल्या शेत गट न. १५/१० मधील कुळाचे नाव कमी करण्यासाठी तहसिल कार्यालय, धाराशीव येथे अर्ज दाखल केला होता. सदर अर्जावरुन तहसिलदार धाराशिव यांनी मंडळ अधिकारी तेर यांना अर्जदार यांचे अर्जावरुन स्थळपाहणी करुन पंचनामा करुन स्थळपाहणी अहवाल सादर करण्याबाबत आदेशीत केले होते. त्यावरून तक्रारदार यांचे शेताची स्थळ पाहणी करुन पंचनामा करुन स्थळ पाहणी अहवाल मंडळ अधिकारी यांचे मार्फतीने तहसिलदार यांना सादर करण्यासाठी तलाठी भूषण चोबे व त्यांचा खाजगी लिपीक भारत मगर हे तक्रारदार यांचेकडे 5 हजार रुपये लाच मागणी करत असलेबाबत आज रोजी तक्रार प्राप्त झाली होती. पंचासमक्ष 5 हजार रुपयेची लाच मागणी करुन तडजोडीअंती 4 हजार लाच रक्कम स्विकारण्याचे मान्य केले व स्वीकारताना अटक केली.
आरोपी तलाठी याचेविरुध्द कलम 12 भ्र.प्र.अधिनियम अन्वये व आरोपी खासगी लिपीक विरुध्द कलम 7 a भ्र.प्र.अधिनियम अन्वये पोलीस ठाणे धाराशिव ग्रामीण, जि. धाराशीव येथे गुन्हा दाखल करण्याची प्रक्रिया चालु असुन आरोपींना अटक केली आहे.सापळा अधिकारी सिध्दाराम म्हेत्रे, पोलीस उप अधीक्षक यांनी काम पाहिले, सापळा पथकात पोलीस अंमलदार- नेताजी अनपट, आशीष पाटील, नागेश शेरकर यांचा समावेश होता.
