धाराशिव – समय सारथी
धाराशिव जिल्ह्यातील 3 कला केंद्रावर एका विवाहित महिलेला कलेच्या नावाखाली वेश्या व्यवसाय करायला भाग पाडल्याचा गंभीर प्रकार समोर आला असुन पीडितीने दिलेल्या तक्रारीवरून पोलिसात गुन्हा नोंद करण्यात आला आहे. फिर्यादीनुसार तिला धाराशिव जिल्ह्यातील पिंजरा, महाकाली व साई कला केंद्र या 3 तर लातुर जिल्ह्यातील बुधडा कला केंद्रात बळजबरीने डांबून ठेवुन मारहाण करण्यात आली. ग्राहकांसोबत पैशाच्या बदल्यात वेश्या व्यवसाय करायला भाग पाडले. कला केंद्राच्या नावाखाली चालणाऱ्या रॅकेटचा पर्दाफाश या महिलेने केला असुन आपबिती सांगितली आहे.
धाराशिव जिल्ह्यातील कला केंद्र वादाच्या भोवऱ्यात सापडलेली असतानाच हे प्रकरण समोर आले आहे. महाकाली केंद्र सोडले तर इतर 4 केंद्राचा परवाना जिल्हाधिकारी कीर्ती किरण पुजार यांनी पोलिस अधीक्षक रितु खोखर यांच्या अहवालानंतर कायमस्वरूपी बंद केला आहे. पालकमंत्री प्रतापराव सरनाईक यांनी चुकीचे प्रकार करणाऱ्या कला केंद्रावर कारवाईचे निर्देश दिले होते. या प्रकरणात उच्च स्तरीय चौकशीची मागणी होत आहे.
पिडीत महिलेच्या तक्रारीनंतर पिटा कायदा व भारतीय न्याय संहिता कलम 115(2), 3(5), 351(3) व 64(2)(m) अन्वये पुणे ग्रामीण येथील वालचंदनगर पोलिस ठाण्यात गुन्हा करण्यात आला असुन तपासासाठी हे प्रकरण धाराशिव ग्रामीण पोलिसाकडे वर्ग करण्यात आले आहे. या प्रकरणी पुणे वाघोली येथील सोनाली वाघ, लातुर येथील सचिन चंद्रकांत कापसे, सोनाली चंद्रकांत कापसे, अजय कापसे, माधुरी गिरी, अनिता कापसे व कविता कोळपेकर, बीड परळी येथील माधुरी गिरी व धाराशिव येथील अंजली अशा 9 संशयित आरोपी विरोधात गुन्हा नोंद करण्यात आला. या प्रकरणात कला केंद्रवरील आणखी कोणी सहभागी आहेत का ? इतर कोणावर अत्याचार झाला आहे का ? यांचा तपास पोलिस करीत आहेत.
एका पिडीत महिलेने दिलेल्या फिर्यादीनुसार, ती विवाहित होती मात्र नवरा तीला दारू पिऊन मारहाण करीत होता. तीने तीच्या संसाराची आपबिती तिची मैत्रीण सोनाली वाघ हिला सांगितली त्यानंतर पतीच्या त्रासाला कंटाळुन ती येडशी येथील पिंजरा कला केंद्रात आली. तिथे तीने तिची ओळख मालकीण असलेल्या कविता कोळपेकर हिच्याशी करून दिली. मैत्रिणीने तिथे मॅनेजर असलेल्या सचिन चंद्रकांत कापसे याच्याशी ओळख करून दिली. तेथे सचिन कापसे हा ग्राहक आले की त्यांचेशी बोलनी करुन ग्राहकांना मुली दाखवायचा व ग्राहक मूली पसंद करुन त्यांना वेश्यागमनासाठी कला केन्द्र बाहेर घेऊन जायचे.
जेव्हा पिडीत महिलेला हा प्रकार समजला तेव्हा तीने कला केद्राबाहेर जाणेसाठी हट्ट केला असता तेथील मालकिन कविता कोळपेकर हिने मारहाण करुन डांबुन ठेवले. मारहाण केल्यानंतर एका ग्राहकासोबत सचिन हा येडशी येथील एका लॉजवर घेऊन गेला व तिथे अनैतिक संबंध ठेवले. लग्नाचे आमिष देऊन सचिन याने संबंध ठेवले त्यानंतर त्याची सख्खी बहीण सोनाली चंद्रकांत कापसे हिच्याकडे साईनगर लातुर येथे घेऊन गेला.
सोनाली कापसे या अगोदर पिंजरा कला केंद्र येथे होती, साईनगर येथे पीडितेला काही दिवस ठेवलेनंतर तिथे मारहाण करायला सुरुवात झाली. त्यांनी मिळून पीडितेला बुधडा कला केन्द्र, औसा रोड, लातुर येथे रेखा जाधव या मालकीनीकडे 30 हजार रुपये घेऊन कामाला ठेवले, तिथेही तीला वेश्या व्यवसाय करायला भाग पाडले. सोनाली कापसे व अनिता कापसे हे पिडीत महिलेला महाकाली कला केंद्र येरमाळा येथे घेऊन गेले. तेथे माधुरी गिरी मालकिनकडे या तिघी राहिल्या तेथेही मालकिन माधुरी गिरी ग्राहकांकडुन पैसे घेऊन वेश्याव्यवसाय करुन घेत होती. साई कला केंद्र नावाची पार्टी सोनाली कापसे हिने काढुन काढली तेथेही वेश्या व्यवसाय करायला भाग पाडले.
गुन्ह्यात अटक टाळण्यासाठी काही आरोपीनी अटकपूर्व जामिनासाठी अर्ज केला होता. सुनावणी दरम्यान ऍड अमोल वरुडकर यांनी बाजु मांडली. सदर तक्रार ही आकसापोटी करण्यात आली असून, आरोपीचा यातील सहभाग तपासात अद्याप स्पष्ट झालेला नाही. आरोपी तपासाला पूर्ण सहकार्य करण्यास तयार असून, त्याची कोणतीही रिकव्हरी बाकी नसल्याने पोलिस कोठडीत ठेवण्याची गरज नाही, असा युक्तिवाद करण्यात आला. संशयित आरोपी कविताच्या वतीने वकिलांनी केलेला युक्तिवाद गाह्य धरून जामीन मंजुर करण्यात आला. ऍड वैभव खांडेकर, ऍड बालाजी पोतदार,ऍड सचिन जाधव, ऍड जनक साळुंखे, अँड विक्रम माने, ऍड दीपक तुपसुंदरे यांनी काम पाहिले.
