धाराशिव – समय सारथी
शनैश्वर मंदीर परिसरात काही दुकानदाराकडुन पूजेच्या ताटाच्या नावाखाली भाविकांच्या होत असलेल्या लुटीचा अनुभव विभागीय आयुक्त डॉ प्रवीण गेडाम यांना आला. एका दुकानदाराने गेडाम यांना चक्क 1 हजार 100 रुपयांना पूजेचा ताट विकले. अवाजवी दराने पूजा साहित्य विकले जात असल्याचे निदर्शनास आल्यानंतर गेडाम यांनी सर्व विक्रेत्यांना जाहीर दर फलक लावण्याचे आदेश दिले.
अहिल्यानगर जिल्ह्यातील शनिशिंगणापूर येथील शनैश्वर देवस्थानाचा कारभार प्रशासक नाशिकचे विभागीय आयुक्त डॉ प्रवीण गेडाम यांनी स्वीकारला. डॉ गेडाम यांनी वेशभूषा बदलून सामान्य भाविकासारखे तिथे जात पूजा साहित्य खरेदीचा अनुभव घेतला.
डॉ गेडाम यांनी देवस्थानच्या विभागप्रमुखांची बैठक घेत कामकाजाचा आढावा घेतला. तत्पूर्वी सकाळी त्यांनी शासकीय लवाजमा बाजुला ठेवत सामान्य भाविकासारखे जात पूजा साहित्य विक्रेत्यांच्या दुकानांना भेटी देत पूजेसाठी आकारल्या जाणाऱ्या दरांची प्रत्यक्ष पाहणी केली. त्यावेळी त्यांना एकाने 1 हजार 100 रुपयांना पूजेचे ताट दिले, त्यानंतर त्यांनी दराचे बोर्ड लावण्याचा निर्णय घेतला.
जिल्हाधिकारी डॉ. पंकज आशिया, जिल्हा परिषदेचे सीईओ आनंद भंडारी, उपजिल्हाधिकारी अतुल चोरमारे, प्रांताधिकारी सुधीर पाटील यांच्यासह अधिकारी बैठकीना उपस्थित होते.
डॉ प्रवीण गेडाम हे धाराशिव जिल्हाधिकारी असताना त्यांनी तुळजाभवानी मंदीर संस्थानचे अध्यक्ष म्हणुन तुळजाभवानी मंदिरात अमूलाग्र बदल केले. त्यांच्या निर्णयामुळे तुळजाभवानी मंदिरात सिंहासन पेटीत सोने चांदी जमा व्हायला सुरुवात झाली तसेच मंदिराच्या मठाना विविध सेवेसाठी दिलेल्या जमिनीचा विषय गाजला. दर्शन व्यवस्थेसह अन्य निर्णय घेल्याने भाविकांची मोठी सोय झाली. गेडाम यांच्याकडुन शनैश्वर देवस्थानबाबत देखील राज्यभरातील भाविकांना मोठ्या अपेक्षा आहेत.
लटकू पद्धत बंद करणार
लटकूंबाबत खासगी वाहनतळ व देवस्थान वाहनतळ दुकानदारांची आयुक्त डॉ. गेडाम यांनी जनसंपर्क कार्यालयात बैठक घेतली. यावेळी ते म्हणाले की, लटकुमुळे भाविकांना मोठा ग्रास होत आहे. लटकू पद्धत बंद केली जाईल. पूजा साहित्य खूप जादा दराने विकले जात असून, याबाबत सर्वाधिक तक्रारी आहेत. त्यासाठी सर्वांनी पूजेच्या दराचे मोठे फ्लेक्स लावा. भाविकांना सक्ती करू नका, अशा तक्रारी आल्यास कठोर कारवाई केली जाईल, असा इशारा त्यांनी दिला.
नाशिक कुंभमेळ्याची डॉ गेडाम यांच्यावर जबाबदारी
नाशिक आणि त्र्यंबकेश्वर येथे होणाऱ्या सिंहस्थ कुंभमेळा जगातील सर्वात मोठ्या धार्मिक मेळाव्यांपैकी एक आहे, जो दर 12 वर्षांनी गोदावरी नदीच्या काठावर होतो. कुंभमेळा विकास प्राधिकरणचे अध्यक्ष डॉ गेडाम असुन कुंभमेळ्याची सुरुवात 31 ऑक्टोबर 26 रोजी होईल आणि 24 जुलै 28 पर्यंत चालेल, ज्यात अनेक शाही स्नानांचे आणि विविध धार्मिक कार्यक्रमांचे आयोजन केले जाणार आहे.
