धाराशिव – समय सारथी
तुळजापूर येथील ड्रग्ज तस्करीत धाराशिव पोलिसांनी मोठी कारवाई केली असुन 2 तस्करांना अटक केली आहे. सुल्तान उर्फ टिपू शेख याला पुणे येथून तर सोलापूर येथून जीवन साळुंके याला अटक केली आहे. शेख यांच्याकडुन गांजा जप्त करण्यात आला आहे, 4 मार्च नंतर तब्बल 20 दिवसानंतर पोलिसांना ड्रग्ज रॅकेटमध्ये नवीन आरोपी अटक करण्यात यश मिळाले असुन महत्वाचे धागेदोरे हाती लागले आहेत. पुणे व सोलापूर ड्रग्ज तस्करी लिंक यानिमित्ताने उघड झाली आहे. पोलीसांनी 3 कारवाईत 64 ग्रॅम ड्रग्ज असलेल्या 89 पुड्या जप्त केल्या आहेत.
सुल्तान उर्फ टिपू शेख या पुणे येथील तस्करास नळदुर्ग येथून अटक करण्यात आली आहे, त्याच्यावर खुन, तस्करी सह 10 ते 15 गंभीर गुन्ह्याची नोंद असल्याची माहिती आहे तर जीवन साळुंके याला सोलापूर येथून अटक करण्यात आली आहे. सोलापूरहुन ड्रग्ज खरेदी करणारे सयाजी चव्हाण, सुमित शिंदे, ऋतूराज गाडे व संकेत शिंदे या 4 जणांना ड्रग्जसह 4 मार्च रोजी अटक करण्यात आली त्यावेळी त्यांनी साळुंके याच्याकडुन ड्रग्ज खरेदी केल्याचे कबुल केले होते, तेव्हापासुन पोलिस साळुंके याच्या मागावर होते.
पोलिस अधीक्षक संजय जाधव व अपर पोलीस अधीक्षक शफकत आमना मॅडम , उपविभागीय अधिकारी डॉ निलेश देशमुख हे स्वतः यावर लक्ष ठेवुन आहेत. जिल्हा सरकारी वकील ऍड महेंद्र देशमुख हे सरकारच्या वतीने कोर्टात सक्षम बाजु मांडत आहेत. तामलवाडी पोलिस निरीक्षक गोकुळ ठाकुर हे दिवसरात्र तपास करीत आहेत. ड्रग्ज तस्करीत आरोपींची संख्या 16 वरून 18 झाली आहे, त्यातील 2 जण पोलिसांच्या ताब्यात, 10 जण जेलमध्ये आहेत तर तुळजापूर येथील पिनू तेलंग व मुंबई येथील वैभव गोळे हे 2 जण फरार आहेत. 4 नावे पोलिसांनी गोपनीय ठेवत ती डायरीत नमुद केली आहेत.आणखी काही नावे तपासात निष्पन्न होऊ शकतात व आरोपीची संख्या वाढू शकते. त्या 4 आरोपीच्या मागावर पोलिस आहेत.
तुळजापूर येथील अमित उर्फ चिमू अशोकराव आरगडे व युवराज देविदास दळवी आणि नळदुर्ग येथील संदीप संजय राठोड या 3 आरोपीना 45 ग्रॅम ड्रग्ज असलेल्या 59 पुड्या ड्रग्जसह 14 फेब्रुवारीला तामलवाडी येथे रंगेहात अटक करण्यात आली. त्यानंतर या 3 आरोपीना ड्रग्ज पुरवठा करणारी मुंबई महिला तस्कर संगीता गोळेला 22 फेब्रुवारी,संतोष खोतला 27 फेब्रुवारी,तुळजापूर तालुक्यातील सराटी येथील विश्वनाथ उर्फ पिंटू मुळे याला 28 फेब्रुवारीला अटक करण्यात आली. सोलापूरहुन ड्रग्ज खरेदी करणारे सयाजी चव्हाण, सुमित शिंदे, ऋतूराज गाडे व संकेत शिंदे या 4 जणांना 18 ग्रॅम ड्रग्ज असलेल्या 30 पुड्या ड्रग्जसह 4 मार्च रोजी अटक करण्यात आली. यातील अरगडे, दळवी, राठोड, संगीता गोळे, संतोष खोत, पिंटू मुळे, सयाजी चव्हाण, सुमित शिंदे, ऋतूराज गाडे, संकेत शिंदे हे 10 जण जेलमध्ये आहेत. स्वराज उर्फ पिंटू तेलंग व वैभव मुळे हे 2 आरोपी फरार आहेत.
