धाराशिव – समय सारथी
धाराशिव शहरात रस्ते, पाणी, उद्योग, बेरोजगारी यासह अनेक समस्या जैसे थे असताना ड्रग्ज, पार्लर कल्चर रुजत आहे. सुरु झालेल्या ‘मसाज पार्लर’ कल्चरची संकल्पना कोणाची ? धंद्याचा पाठीराखा कोण ? हाच का विकास ? असा प्रश्न आता विचारला जाऊ लागला आहे. ड्रग्जनंतर धाराशिवमध्ये ‘पार्लर’ कल्चर सुरु होत होते मात्र पोलिस अधीक्षक संजय जाधव यांनी वेळीच हालचाली सुरु केल्याने याला तात्पुरता ‘लगाम’ बसला. ड्रग्जला जसा तुळजापुरात स्थानिक राजकीय नेत्यांचा आश्रय मिळाला तसा इथे ‘पार्लर’ ला ‘बस्तान’ बसवण्यासाठी ‘आश्रय’ मिळताना दिसत आहे. सर्वपक्षीय राजकीय नेत्यांनी सामाजिक जबाबदारीचे भान ठेवत अश्या विषयांना व कार्यकर्ते यांना वेळीच आवर घालणे गरजेचे आहे. ‘पार्लर’ सुरु करण्यासाठी पोलिसांनी कोणतीही परवानगी, नाहरकत दिली नाही, मग हे कोणाच्या आशीर्वादामुळे सुरु झाले हा प्रश्न आहे. ‘पार्लर’चा पार्टनर व आर्थिक फायद्याचा ‘लाभार्थी’ कोण हे शोधणे गरजेचे आहे. थोडी ‘विश्रांती’ घेत संधी साधुन पुन्हा ते सुरु करण्याच्या हालचाली सुरु झाल्या आहेत. विनापरवाना सुरु केलेल्या मसाज पार्लरवर व जागा मालकांवर पोलिसांनी चौकशीअंती गुन्हा नोंद करण्याची मागणी होत आहे.
धाराशिव शहरात 2 ठिकाणी विनापरवाना मसाज पार्लर सुरु करण्यात आले आहेत, या ठिकाणी मसाजच्या नावाखाली खुलेआम अनैतिक प्रकार सुरु असल्याची कुणकुण लागताच पोलिसांनी पावले उचलत चौकशी सुरु केली आणि या प्रकाराला वेळीच ‘लगाम’ लागला. पोलीस अधीक्षक संजय जाधव यांच्या आदेशाने उपविभागीय पोलीस अधिकारी स्वप्नील राठोड यांनी चौकशी व हालचाली सुरु करताच हे सेंटर तात्पुरते ‘शटर डाऊन’ करण्यात आले होते. धाराशिव जिल्ह्यात असे प्रकार खपवून घेतले जाणार नाही, यासाठी पर्याप्त उपाययोजना केल्या जातील, थारा दिला जाणार नाही असे पोलीस अधीक्षक संजय जाधव यांनी यानिमित्ताने सांगितले.
धाराशिव शहरातील मुख्य वस्तीत असलेल्या ठिकाणी मसाज पार्लर सुरु करण्यात आले आहेत. इथे आल्यावर 1 ते 2 हजार रुपयांचे बेसिक पॅकेज घ्यायचे व अंधाऱ्या खोलीत आत रूममध्ये गेल्यावर मुलीसोबत ‘अर्थ’ पुर्ण व्यवहार करुन हवे ते ‘हेवन’ सुख मिळेल असा दावा केला जातो. डॉ बाबासाहेब आंबेडकर चौकजवळ असलेल्या एका कॉम्प्लेक्स व ज्ञानेश्वर मंदीर परिसरात हे सेंटर सुरु करण्यात आले आहेत. या दोन्ही ठिकाणी 3-4 मुली मसाज सेवा देण्याचे काम करतात मात्र त्याना कारवाईची ‘कुणकुण’ लागताच सुट्टीवर पाठवण्यात आले आहे. शहरातील ज्या कॉम्प्लेक्समध्ये हे सेंटर सुरु आहे त्या जागेचा मालक हा ‘नगरसेवक’ असुन एका राजकीय पक्षाशी संबंधित असुन त्यांनी नुकतेच पक्षांतर केले आहे, या व्यवसायाला राजकीय पाठबळ तर नव्हे ना असा प्रश्न विचारला जात आहे, संबंधित लोकप्रतिनिधी मात्र यावर गप्प आहेत, बेरजेच्या व सोईच्या राजकारणात काहींना धन्यता वाटते. या सेंटरला ‘अक्षय’ ऊर्जा राजकारनाच्या माध्यमातून पुरवली जात असल्याचा संशय आहे.
विशेष म्हणजे या मसाज पार्लरचे व्यवस्थापन हे सोलापूर व उत्तर प्रदेशातील काही टोळ्या करीत आहेत. मुंबई, पुणे येथील तरुणीना इथे आणुन त्यांच्याकडुन विविध सेवा दिल्या जात आहेत. उत्तर प्रदेश ते धाराशिव हे ‘पार्लर कनेक्शन’ न उलघडलेले कोडं आहे. ड्रग्ज मुळे जसे तुळजापूर बदनाम झाले तसे आगामी काळात मसाज पार्लर मुळे धाराशिव बदनाम होऊ नये अशी सामान्यांना अपेक्षा आहे, यात तरुण पिढीचे नुकसान होऊ शकते.
