धाराशिव – समय सारथी
तुळजापूर येथील ड्रग्ज तस्करी प्रकरणात काही गोपनीय माहिती असल्यास ती कळवावी, माहिती देणाऱ्यास 11 हजाराचे रोख बक्षिस जाहीर करणारा धाराशिव शहरातील मसाज पार्लरचा ‘आश्रयदाता’ असल्याचे समोर आले आहे. विनापरवाना व अवैधरित्या सुरु केलेल्या या मसाज सेंटर व जागा मालकावर पोलीस कारवाई करणार का? हा प्रश्न आता विचारला जात आहे. पार्लर ‘कल्चर’ रुजू होण्यास सुरुवात होताच पोलीस अधीक्षक संजय जाधव यांनी याला लगाम लावला आहे, तात्पुरते ‘शटर डाऊन’ झाले असले तरी ते पुन्हा सुरु करण्याच्या हालचाली सुरु आहेत. ड्रग्ज तस्करीत जशी पोलिसांनी ठोस कारवाई केली ती ‘पार्लर’ प्रकरणातही होईल अशी अपेक्षा आहे. एकीकडे सामाजिक भान असल्याचे सोंग घेत प्रबोधन करायचे तर दुसरीकडे चुकीच्या ‘कल्चर’ला ‘आश्रय’ द्यायचा, हा नवीन प्रकार जोर धरत आहे, विशेष म्हणजे काही राजकीय कार्यकर्ते त्यात अग्रेसर आहेत.
धाराशिव शहरातील मुख्य वस्तीत असलेल्या ठिकाणी मसाज पार्लर सुरु करण्यात आले आहेत. इथे आल्यावर 1 ते 2 हजार रुपयांचे बेसिक पॅकेज घ्यायचे व अंधाऱ्या खोलीत आत रूममध्ये गेल्यावर मुलीसोबत ‘अर्थ’ पुर्ण व्यवहार करुन हवे ते ‘हेवन’ सुख मिळेल असा दावा केला जातो. डॉ बाबासाहेब आंबेडकर चौकजवळ असलेल्या एका कॉम्प्लेक्स व ज्ञानेश्वर मंदीर परिसरात हे सेंटर सुरु करण्यात आले आहेत. या दोन्ही ठिकाणी 3-4 मुली मसाज सेवा देण्याचे काम करतात मात्र त्याना कारवाईची ‘कुणकुण’ लागताच तात्पुरते सुट्टीवर पाठवण्यात आले आहे. शहरातील ज्या कॉम्प्लेक्समध्ये हे सेंटर सुरु आहे त्या जागेचा मालक हा ‘नगरसेवक’ असुन एका राजकीय पक्षाशी संबंधित असुन त्यांनी नुकतेच पक्षांतर केले आहे, या व्यवसायाला राजकीय पाठबळ तर नव्हे ना असा प्रश्न विचारला जात आहे, संबंधित लोकप्रतिनिधी ड्रग्ज सारखेच यावर पांघरून घालत आहेत. या सेंटरला लागणारी ‘अक्षय’ ऊर्जा राजकारनाच्या माध्यमातून पुरवली जात असल्याचा संशय आहे.
विशेष म्हणजे या मसाज पार्लरचे व्यवस्थापन हे सोलापूर व उत्तर प्रदेशातील काही टोळ्या करीत आहेत. मुंबई, पुणे येथील तरुणीना इथे आणुन त्यांच्याकडुन विविध सेवा दिल्या जात आहेत. उत्तर प्रदेश ते धाराशिव हे ‘पार्लर कनेक्शन’ न उलघडलेले कोडं आहे. आगामी काळात मसाज पार्लरचे धाराशिव अशी ओळख होऊ नये, ही अपेक्षा. विनापरवाना सुरु केलेल्या मसाज पार्लरवर व जागा मालकांवर पोलिसांनी चौकशीअंती गुन्हा नोंद करण्याची मागणी होत आहे.
