2 गहाळ मोबाईल, 12 जणासोबत आर्थिक व्यवहार, गुन्हेगारी पार्श्वभूमी – अधिकचे पुरावे
धाराशिव – समय सारथी
तुळजापूर येथील ड्रग्ज तस्करी गुन्ह्यात अटक आरोपी शुभम नेप्ते व विनोद गंगणे या दोघांची पोलीस कोठडी संपणार असुन त्यांना धाराशिव येथील जिल्हा व सत्र न्यायाधीश टी जी मिटकरी यांच्या कोर्टात हजर केले जाणार आहे. शुभम नेप्ते याची 14 दिवसांची तर गंगणे यांची वाढीव 3 दिवसांची पोलीस कोठडी 12 जुन रोजी संपणार आहे. पोलिसांवर राजकीय दबाव असुन त्याच्या कोर्टातील भुमिकेवर लक्ष लागले आहे.
पोलीस कोठडी दरम्यानच्या तपासात पोलिसांना हाती काय लागले, ड्रग्ज गुन्ह्यात गंगणे यांचे 2 गहाळ मोबाईलसह अन्य मुद्यावर पोलिसांनी काय केले? हे कोर्टात उघड होणार आहे. पोलीस तपास व त्यांच्यावर राजकीय दबाव यावर कोर्टाने प्रश्नचिन्ह निर्माण केले असुन कोर्टात पुराव्यांची ‘कसोटी’ व पोलिसांची ‘सत्वपरीक्षा’ होणार आहे. कोर्टात आरोपी व सरकारी वकील यांच्यातील ‘हाय व्होल्टेज’ युक्तीवाद पहायला मिळणार आहे. गंगणे हे पोलीस कोठडी दरम्यान तब्येत बिघडल्याने रुग्णालयात उपचारासाठी दाखल होते.
सोलापूर येथील ड्रग्ज तस्कर पिटा सुर्वे याच्या सोबत गंगणे यांचे आर्थिक व्यवहार सापडले आहेत. पोलिसांनी कोर्टात दाखल केलेल्या रिमांड वेळी सोलापूर येथील आरोपी पिटा सुर्वे याला पाहिजे असलेला फरार आरोपी दाखवले आहे. गंगणे यांचे मुंबई येथील ड्रग्ज तस्कर संगीता गोळे, संतोष खोत, युवराज दळवी,विश्वनाथ मुळे, गजानन हंगरगेकर,बापु कणे, प्रसाद घोटण कदम,आबासाहेब पवार,विनायक इंगळे,संदीप टोले,विशाल सोंजी असा तब्बल 12 जणासोबत 12 लाख पेक्षा अधिकचे आर्थिक व्यवहार सापडले आहेत.
आमदार राणाजगजीतसिंह पाटील यांच्या प्रेरणेने व सहकार्यातुन विनोद गंगणे हे व्यसनमुक्त झाले,त्यांचे मन मत परिवर्तन झाले व त्यांनी ड्रग्ज रॅकेट नष्ट करण्यासाठी पोलिसांना ‘खबरी’ म्हणुन ‘टीप’ दिली. आमदार, विनोद व विजय गंगणेयासह कोर्टात त्यांच्या वकिलांनी हा दावा केला आहे. गंगणे यांनी माहिती दिली तर मग त्यांनी त्यांचे 2 मोबाईल पोलिसांना का दिले नाहीत, 25 मार्चला आरोपी म्हणुन नाव निष्पन्न झाल्यावर मोबाईल गहाळ झाल्याचा गुन्हा 28 मार्चला मोहोळ येथे दाखल केला असा सवाल कोर्टाने केला. गंगणे यांच्या विरोधात दोषारोप पत्रात पुरावे होते तर त्यांना सेवन गटात का घेतले? राजकीय दबाव होता का? ते एका पक्षाचे प्रतिनिधी आहेत म्हणुन तसे केले या कोर्टाच्या प्रश्नावर तपास अधिकारी निरुत्तरित झाले. थंड डोक्याने कट रचून केलेला अपराधी कृत्य, इतरांना ड्रग्ज सेवनाबाबत दिलेले प्रोत्साहन हे अडचणीचे विषय आहेत.
तुळजापूर ड्रग्ज प्रकरणात 15 आरोपींची जामीन कोर्टाने नाकारली असुन एकाला अटकपूर्व जामीन दिली आहे. सेवन गटातील फरार आरोपी जगदीश कदम 16 जुन, तस्कर गटातील फरार उदय शेटे 13 जुन, सेवन गटातील जेलमधील आबासाहेब पवार 13 जुन व माजी सभापती शरद जमदाडे 16 जुन रोजी तर नियमित सुनावणी 17 जुनला होणार आहे.
ड्रग्ज तस्करीत 37 आरोपी असुन 20 जण अटकेत असुन 16 जन फरार आहेत तर अलोक शिंदे यांना अटकपुर्व जामीन मिळाला आहे. फरार आरोपींचा शोध पोलिसांची विविध पथक घेत आहेत, आणखी 1 आरोपी निष्पन्न झाला आहे. पोलीसांनी कोर्टात चार्जशीट दाखल करताना 15 एप्रिल रोजी माजी नगराध्यक्ष संतोष कदम परमेश्वर यांना 36 वा आरोपी केले होते, त्यानंतर दीड महिन्यानंतर 29 मे रोजी 37 वा आरोपी निष्पन्न करीत अटक केली तर गंगणे यांना 6 जुन रोजी अटक केली.
आरोपी शुभम नेप्ते याचे अमित अरगडे, नानासाहेब खुराडे व इतर आरोपीशी आर्थिक व्यवहार, संभाषण झाल्याचे पुरावे मिळाले आहेत, ड्रग्ज तस्करीत याचा सहभाग आहे असे समोर आले आहे. गंगणे व नेप्तेच्या सहभागाबाबत इतर आरोपी व साक्षीदार यांनी जबाब दिले असल्याची बाजु ऍड महेंद्र देशमुख व सपोनि गोकुळ ठाकुर यांनी बाजु मांडली.
