श्री तुळजाभवानी देवींची ललिता पंचमीनिमित्त रथ अलंकार महापूजा – नवरात्र विशेष

तुळजापूर – समय सारथी 

महाराष्ट्राची कुलस्वामिनी श्री तुळजाभवानी देवीजींच्या शारदीय नवरात्र महोत्सवास 22 सप्टेंबरपासून सुरुवात झाली. आज पाचव्या माळेच्या दिवशी ललिता पंचमीनिमित्त रथ अलंकार महापूजा संपन्न झाली.यावेळी भाविकांनी मोठ्या उत्साहाने उपस्थित राहून देवीजींचे दर्शन घेतले.

धार्मिक आख्यायिकेनुसार भगवान सुर्यनारायण यांनी त्रिलोक भ्रमणासाठी आपला रथ श्री तुळजाभवानी मातेस दिला होता.त्या परंपरेतून आजही रथ अलंकार अवतार पूजेला विशेष महत्व आहे. दरम्यान,गुरुवार, 25 सप्टेंबर रोजी चौथ्या माळेच्या दिवशी मोर वाहनावरून श्री तुळजाभवानी देवींजींची पारंपरिक छबिना मिरवणूक काढण्यात आली.या मिरवणुकीत भाविक मोठ्या संख्येने सहभागी झाले होते.

शारदीय नवरात्र उत्सवाच्या उर्वरित दिवसांत दररोज वेगवेगळ्या वाहनांवरून देवीची छबिना मिरवणूक काढण्यात येणार असून भाविकांना या सोहळ्याचे दर्शन घेता येणार आहे. मंदिर संस्थानच्या वतीने भाविकांसाठी आवश्यक सोयी-सुविधांची व्यवस्था करण्यात आली आहे.