धाराशिव – समय सारथी
तुळजाभवानी भारताची ‘भारतमाता’ व महाराष्ट्राची ‘कुलस्वामिनी’ आहे असा उल्लेख असलेले पत्र तुळजाभवानी मंदीर संस्थानने पुजारी मंडळाला दिले असुन 108 फुट मुर्ती बाबत अभिप्राय मागितला आहे. ‘तुळजाभवानी’ चा ‘भारतमाता’ असा पत्रातील उल्लेखावरून वाद निर्माण झाला असुन त्याला व 108 फुटाच्या मूर्तीच्या स्वरूपाला भोपे व पाळीकर पुजारी मंडळाने विरोध दर्शवला आहे. अध्यक्ष विपीन शिंदे व अमर राजे परमेश्वर कदम यांनी याचा निषेध केला आहे.
तुळजाभवानी ही ‘भारत माता’ असा इतिहासात कुठेही संदर्भ, उल्लेख नाही, असे असताना हे कोन केले ? हा शोध कोन लावला, कोणाची कल्पना व कोणाच्या सांगण्यावरून ? तुळजाभवानीची ओळख बदलण्याचा प्रयत्न कोन करत आहे? असे होत आहे असे सवाल निर्माण झाले आहेत. तुळजाभवानी ही ‘भारतमाता’ असा भावनीक मुद्दा पुढे करुन राजकीय स्वार्थ साधण्याचा डाव रचला असल्याचा आरोप होत आहे. काही जणासाठी हा ‘राजसत्ता’ मिळवण्याचा मार्ग असल्याचे बोलले जात आहे.
पालकमंत्री प्रतापराव सरनाईक यांनी तुळजाभवानी मंदीर विकास आराखडाबाबत 17 जुन रोजी मुंबईत बैठक बोलावली असुन त्या बैठकीला भोपे, पाळीकर, उपाध्ये या तिन्ही पुजारी मंडळ व मठाचे महंत व इतरांना आमंत्रण देण्यात आले नाही, पालकमंत्री याची दखल घेणार का? असाही सवाल उपस्थितीत होत आहे.पालकमंत्री यांनी स्वतः वयक्तिक मत मांडताना तुळजाभवानी माता छत्रपती शिवाजी महाराज यांना भवानी तलवार देतानाची मुर्ती ही द्विभुजा ( भवानी तलवार अलंकार पुजा) असावी असे सांगितले होते.
मंदीर संस्थान पत्रातील उल्लेख – श्री तुळजाभवानी मंदिर हे एक धार्मिक मर्मस्थळ आहे. श्री तुळजाभवानी माता, भारताची भारतमाता व महाराष्ट्राची कुलस्वामिनी आहे. श्री देविजच्या दर्शनासाठी आंध्रप्रदेश, कर्नाटक, तामिळनाडु व महाराष्ट्र राज्यासह लाखो भाविक कुलाचार व कुलधर्म करणेसाठी तुळजापूर तिर्थक्षेत्र येथे येत असतात.महाराष्ट्र शासनाने श्री तुळजाभवानी मंदिर संस्थानाच्या वतीने प्रस्तावित केलेल्या विकास आराखड्यास दिनांक 28 मे 2025 रोजी च्या शासन निर्णयानुसार 1865 कोटी रूपये प्रशासकीय मान्यता देण्यात आली आहे. त्यान्वये रामदरा तलाव परिसरात श्री तुळजाभवानी आई छत्रपती शिवाजी महाराजांना तलवार देत असल्याचे 108 फुटी शिल्प उभारणे प्रस्तावित आहे. याअनुषंगाने धर्मशास्त्र तसेच रुढी परंपरेनुसार सदर श्रीदेविजींची छत्रपती शिवाजी महाराजांना तलवार देत असल्याचे शिल्प कसे असावे याबाबत कृपया, आपण आपला अभिप्राय कार्यालयास देण्याची विनंती तहसीलदार तथा मंदीर संस्थांनाचे प्रशासन व्यवस्थापक अरविंद बोळंगे यांनी लेखी पत्रात केली आहे.
