धाराशिव – समय सारथी
परंडा येथील ड्रग्ज तस्करी गुन्ह्याचा पुन्हा एकदा तपास करावा अशी भुमिका घेत पोलीस विभागाने तपासासाठी परंडा कोर्टात लेखी पत्र दिले आहे, त्यावर आज 3 मे रोजी सुनावणी होणार असुन कोर्टाच्या निर्णयाकडे लक्ष लागले आहे. परंडा गुन्ह्यात प्रयोगशाळा तपासणीत ड्रग्ज ऐवजी कॅल्शियम क्लोराईड सापडले होते त्यानंतर गुन्हा गैरसमजुतीने दाखल झाला असुन तो रद्द करावा अशी भुमिका घेत कोर्टात क समरी अहवाल दाखल केला होता मात्र नंतर पुन्हा तपास करण्याचे पत्र दिले आहे.
परंडा येथे मोठ्या प्रमाणात ड्रग्ज तस्करी सुरु असुन बार्शी पोलिसांनी कारवाई केली त्यानंतर भाजप नेते माजी आमदार सुजितसिंह ठाकुर यांनी यात अनेक प्रश्न व मुद्दे उपस्थितीत करीत गुन्ह्याचा तपास नव्याने करावा अशी मागणी केली त्याला यश आले आहे. ड्रग्ज नव्हे ते तर कॅल्शियम क्लोराईड या शीर्षकाखाली दैनिक समय सारथीने या प्रकरणाला समोर आणत पाठपुरावा केला आहे. यात ठाकुर यांची भुमिका महत्वाची ठरली, त्यानंतर पोलिसांना कोर्टातील भुमिका बदलावी लागली.
गुप्त बातमीदारामार्फत माहीती मिळाल्यावरून सदरच्या गुन्हयात अधिकचा पुरावा मिळण्याची शक्यता निर्माण झालेली आहे. ड्रग्ज बाळगणे, विक्री करणे हे समाज विघातक कृत्या असुन त्यामुळे तरूण वर्ग ड्रग्जच्या आहारी जावुन गंभीर गुन्हे घडण्याची शक्यता आहे, तरी पोस्टे परंडा गुरनं 10/2024 कलम 8 (क), 20 (ब) एनडीपीएस ऍक्टमध्ये पाठविलेल्या ‘क’ फायनल मध्ये अधिक तपास करण्याची परवानगी व गुन्हयाचे कागदपत्र मिळण्याची लेखी विनंती धाराशिव पोलिसांनी कोर्टात केली आहे. पोलीस अधीक्षक संजय जाधव यांच्या सूचनेनुसार पोलीस निरीक्षक दिलीप पारेकर यांनी परंडा अतिरिक्त सत्र न्यायालयात पत्र दिले असुन त्यावर कोर्ट काय निर्णय घेत आदेश देते हे पाहावे लागेल, या प्रकरणाची सुनावणी 3 मे रोजी होणार आहे.
परंडा येथे 19 जानेवारी 2024 रोजी दाखल गुन्ह्यात पोलिसांनी क समरी अहवाल दाखल केला होता मात्र आता तपासाला परवानगी देण्याची विनंती केली आहे त्यावर कोर्ट 3 मे 2025 ला निकाल देणार आहे. परंडा प्रकरणात ड्रग्ज पकडण्यात आल्यानंतर प्रयोगशाळा तपासणीत ते कॅल्शियम क्लोराईड सापडले होते, त्यानंतर गुन्हा गैरसमजुतीतुन दाखल झाल्याचा निष्कर्ष काढत गुन्हा रद्द करावा असा लेखी अहवाल 19 मार्च 2025 रोजी दिला, यात 2 आरोपीना अटक केली होती. या प्रकरणात 24 एप्रिल 25 रोजी सुनावणी झाली त्यानंतर पोलिसांनी 25 एप्रिलला पत्र दिले.
