धाराशिव – समय सारथी
तुळजापूर येथील ड्रग्ज प्रकरणातील आरोपी माजी सभापती शरद जमदाडे व आबासाहेब पवार या 2 आरोपीना धाराशिव येथील कोर्टाने 27 मे पर्यंत 4 दिवसांची वाढीव पोलिस कोठडी सुनावली आहे. माजी नगराध्यक्ष चंद्रकांत उर्फ बापु कणे यांचा भाचा आबासाहेब पवार याला 17 मे रोजी अटक केली होती तर जमदाडे याला 16 मे रोजी अटक केली, या दोघांची 7 दिवसांची पोलिस कोठडी 23 मे रोजी संपल्यावर त्यांना जिल्हा न्यायाधीश टी जी मिटकरी यांच्या कोर्टात हजर करण्यात आले.
जिल्हा सरकारी वकील ऍड सचिन सुर्यवंशी व तपास अधिकारी सपोनि गोकुळ ठाकुर यांनी कोर्टात आरोपीना वाढीव पोलिस कोठडी हवी असल्याचे सांगितले. मांडलेले तपासाचे मुद्दे व युक्तिवाद ऐकून कोर्टाने वाढीव पोलिस कोठडी सुनावली. हे दोन्ही आरोपी हे सेवन गटातील असुन त्यांना 11 दिवसांची पोलिस कोठडी मिळाली आहे. 7 दिवसांच्या पोलिस तपासात पोलिसांना महत्वाची माहिती व धागेदोरे मिळाले असल्याने अधिक तपासासाठी वाढीव पोलिस कोठडी सुनावण्यात आली आहे.
तुळजापूर येथील ड्रग्ज प्रकरणात 36 आरोपी असुन 18 आरोपी फरार आहेत तर 18 जन अटकेत आहेत. 36 पैकी 16 तस्कर व 2 सेवन गटातील असे 18 आरोपी अटकेत आहेत. तस्कर गटातील 26 पैकी 10 आरोपी फरार आहेत तर सेवन गटातील 10 पैकी 8 आरोपी फरार आहेत. तस्कर गटाप्रमाणे सेवन गटातील आरोपीना पोलीस कोठडी मिळत आहे, त्यामुळे सेवन गटात खळबळ उडाली असुन पोलिस कारवाईचा धसका घेतला आहे.
पोलिस अधीक्षक संजय जाधव व अपर पोलीस अधीक्षक शफकत आमना मॅडम, उपविभागीय अधिकारी डॉ निलेश देशमुख, जिल्हा सरकारी वकील ऍड महेंद्र देशमुख यांच्या मार्गदर्शनाखाली तपास अधिकारी पोलीस निरीक्षक गोकुळ ठाकुर हे तपास करीत आहेत.
फरार आरोपी (18) – माजी नगराध्यक्ष संतोष कदम परमेश्वर, माजी नगराध्यक्ष चंद्रकांत उर्फ बापु कणे, विनोद उर्फ पिटू विलास गंगणे,तस्कर इंद्रजीतसिंग उर्फ मिटू रणजीतसिंह ठाकुर, मुंबई येथील वैभव गोळे, प्रसाद उर्फ गोटन कदम परमेश्वर, उदय शेटे, अलोक काकासाहेब शिंदे,अभिजीत गव्हाड, तुळजापूर येथील स्वराज उर्फ पिनू तेलंग, विनायक इंगळे,शाम भोसले,संदीप टोले,जगदीश पाटील,विशाल सोंजी, अभिजीत अमृतराव,दुर्गेश पवार व सोलापुर जिल्ह्यातील उपळाई येथील अर्जुन हजारे हे सर्व 18 आरोपी फरार असुन पोलिस त्यांचा शोध घेत आहेत.
