धाराशिव – समय सारथी
मराठा आरक्षणासाठी 16 जानेवारी रोजी सकाळी 10 वाजता धाराशिव ते तुळजापूर अशी महावाहन रॅली काढण्यात येणार आहे. मुंबई येथील आंदोलनाच्या पुर्वी गावोगावी नियोजनासाठी कॉर्नर सभा, बैठका घेतल्या जात असुन तयारी अंतीम टप्प्यात आहे.
सकल मराठा समाजाच्यावतीने धाराशिव ते तुळजापूर अशी वाहन रॅली निघणार असुन रॅलीस येताना जे वाहन असेल ते घेऊन यावे असे आवाहन सकल मराठा समाजाने केले आहे. जास्तीत जास्त बांधवानी सहभागी होण्याचे आवाहन केले आहे.
धाराशिव शहरातील छत्रपती शाहू महाराज चौक तेरणा कॉलेज येथून रॅलीस सुरुवात होईल. नंतर महात्मा बसवेश्वर चौक, राजमाता जिजाऊ चौक, डॉ बाबासाहेब आंबेडकर चौक, छत्रपती शिवाजी महाराज चौक, देशपांडे स्टॅन्ड, राजमाता अहिल्यादेवी होळकर चौक असे मार्गक्रमण करीत रॅली तुळजाभवानी मंदिर येथे जाईल व तिथे मराठा बांधव तुळजाभवानी देवीचे दर्शन घेऊन मराठा आरक्षण मिळावे व मुंबई येथील मनोज जरांगे पाटील यांसह सर्व समाज बांधवांचे आंदोलन यशस्वी व्हावे यासाठी साकडे घालतील.
