लोकप्रतिनिधी यांना सहभागी होण्यासाठी ही ‘अट’ – 50 टक्के आत आरक्षण भुमिका जाहीर करावी लागणार
धाराशिव – समय सारथी
ठरलं.. 10 जुलैला मी येतोय धाराशिवला, तुम्हीही या अशी हाक सकल मराठा समाजाने दिली असून मनोज जरांगे पाटील यांच्या नेतृत्वात मराठ्यांची महायल्गार शांतता रॅली निघणार आहे. आज झालेल्या जिल्हा नियोजन बैठकीत या रॅलीची दिशा ठरली, यावेळी जिल्ह्यातील सर्व तालुका, ग्रामीण भागातून आलेल्या प्रतिनिधी यांनी आपआपली मते मांडली व नियोजनात सक्रीय सहभागी होण्याचा निश्चिय केला. जितेंगे लढेंगे, हम सब जरांगे, एक मराठा लाख मराठा अशी घोषणाबाजी करीत परिसर दणाणुन निघाला. प्रत्येक गावात तरुण मावळे जनजागृती बैठक घेणार आहेत. आता मारायचं नाही लढायचं असा संकल्प केला.
पुण्यश्लोक अहिल्यादेवी होळकर चौक येथून शांतता रॅलीला सुरुवात होणार असून त्यानंतर अण्णाभाऊ साठे चौक, धारासूर मर्दीनी, हजरत ख्वाजा शमशोद्दीन गाझी दर्गाह, विजय चौक, माऊली / नेहरू चौक, काळा मारुती मंदीर, पोस्ट ऑफिस, संत गाडगेबाबा चौक, डॉ बाबासाहेब आंबेडकर चौक मार्गे निघेल त्यानंतर छत्रपती शिवाजी महाराज चौक येथे एक ऐतिहासिक सभा होणार आहे. स्वयंसेवक या रॅलीचे त्या दिवशी मार्गात नियोजन करतील. या रॅलीत सहभागी होणाऱ्या मंत्री, खासदार, आमदार यासह इतर लोकप्रतिनिधी यांनी या रॅलीत सहभागी होण्यापुर्वी मनोज जरांगे पाटील यांच्या 50 टक्केच्या आत ओबीसीतुन मराठा आरक्षण मागणीला जाहीर पाठिंबा असल्याचे जाहीर करावे लागणार आहे.
मराठा संघर्ष योद्धा मनोज जरांगे पाटील यांनी शांतता रॅलीची घोषणा केली असुन 10 जुलै रोजी जरांगे पाटील हे धाराशिव जिल्ह्यात येत आहेत.जरांगे हे 10 जुलै रोजी धाराशिव येथे मुक्कामी आहेत. शांतता रॅलीच्या नियोजनासाठी धाराशिव जिल्हा नियोजन बैठक समर्थ नगर येथील लक्ष्मीनारायण मंगल कार्यालयात संपन्न झाली. नियोजन बैठकीला मराठा मावळे एकत्र झाले असुन या बैठकीत शांतता रॅलीची दिशा ठरत असुन अनेक महत्वाचे निर्णय घेतले जाणार आहेत. सभा स्थळी भगवे वादळ निर्माण झाले आहे.
मराठा समाजाला सरसकट आरक्षण मिळावे या मागणीसाठी मनोज जरांगे पाटील यांनी शांतता रॅलीची घोषणा केली आहे. आमरण उपोषणनंतर त्यांनी या रॅलीची घोषणा केली असुन 6 जुलै रोजी हिंगोली पासुन या रॅलीला सुरुवात होणार आहे. 7 जुलै परभणी, 8 जुलै नांदेड, 9 जुलै लातूर, 10 जुलै धाराशिव, 11 जुलै बीड,12 जुलै जालना व 13 जुलै रोजी छत्रपती संभाजीनगर येथे शांतता रॅली निघणार आहे, या रॅलीचे नियोजन करण्यासाठी मराठा समाजाने सुरुवात केली आहे. जिल्ह्यातील सर्व मराठा एका ठिकाणी एकत्र येणार आहे, कोणीही विखरून थांबणार नाही असे मनोज जरांगे यांनी सांगितले.
