धाराशिव – समय सारथी
थोर महापुरुषांच्या जयंती निमित्ताने, वर्गणीच्या नावाखाली जबरदस्तीने देणगीच्या नावावाली खंडणीच्या स्वरुपात अवाच्या सव्वा रक्कम मागणार्‍या जयंती समितींचा व्यापार्‍यांना त्रास होत आहे. त्यामुळे व्यापार्‍यांची आर्थिक परिस्थिती नसताना भरमसाठ पैसे मंडळाच्या माथी मारावे लागत असल्यामुळे अशा अधिकृत आणि अनधिकृत जयंती समित्यांच्या वर्गणी मागणीला चाप लावावा, अशी मागणी जिल्हा व्यापारी महासंघाच्या वतीने जिल्हाधिकारी व पोलीस अधीक्षकांकडे करण्यात आली आहे.
हनुमान जयंती, राम नवमी, 11 एप्रिल रोजी महात्मा ज्योतिबा फुले, 14 एप्रिल रोजी घटनेचे शिल्पकार महामानव डॉ. बाबासाहेब आंबेडकर यांची जयंती निमित्ताने अधिकृत आणि अनधिकृत मंडळाचे पदाधिकारी, व्यापार्‍यांकडे मनमानी पद्धतीने आर्थिक वर्गणी मागणी करत आहेत. वर्गणी मागणार्‍या अनेक मंडळांची अधिकृत नोंद न्यास विभागाकडे नाही. याबाबत पोलीस प्रशासनाने वस्तुस्थिती लक्षात घ्यावी आणि व्यापार्‍यांवर वर्गणीसाठी होणारा दबाव दूर व्हावा याकरिता जिल्हा पोलीस अधीक्षकांना व्यापारी शिष्टमंडळाने, भेटून वस्तुस्थिती मांडली आहे. पोलीस प्रशासनाच्या वतीने पोलीस पथसंथलन करून जनजागृती केली जाणार आहे. व्यापारी मंडळांनी भयमुक्त राहावे. जयंती उत्सव मंडळांना अव्वाच्या सव्वा वर्गणी देऊ नये असे आवाहन करण्यात आले आहे.
यावेळी कॅटचे महाराष्ट्र राज्य उपाध्यक्ष संजय मंत्री, मराठवाडा उपाध्यक्ष संजय मोदानी, जिल्हाध्यक्ष लक्ष्मीकांत (बंटी) जाधव, केमिस्ट अ‍ॅन्ड ड्रगिस्ट असोसिएशनचे जिल्हाध्यक्ष धनाजी आनंदे, सराफ सुवर्णकार असोसिएशनचे कपील शर्मा, हॉटेल ॲन्ड बार असोसिएशनचे बापू सूर्यवंशी, जिल्हा सिड्स अ‍ॅन्ड फर्टिलायजर असोसिएशनचे संजय मोदानी, जिल्हा मशिनरी असोसिएशनचे अविनाश काळे, जिल्हा फर्निचर अ‍ॅन्ड इलेक्ट्रॉनिक्सचे अजहर खान, जिल्हा मुद्रक संघाचे महादेव मुळे, तालुका व्यापारी महासंघाचे नितीन फंड, उपाध्यक्ष विशाल थोरात, अमित मोदानी, संपतराव डोके, जिल्हा सचिव महेश वडगावकर, नितिन नायर, सुभाष शेट्टी, श्याम बजाज व इतर व्यापारी उपस्थित होते.
