धाराशिव – समय सारथी
सोलापूर पोलिसांनी बार्शी येथे मोठी कारवाई करीत ड्रग्ज, गावठी पिस्टेलसह 3 जणांना अटक केली आहे. अटक 3 आरोपी पैकी 2 धाराशिव जिल्ह्यातील परंडा येथील असुन पोलिसांनी गुन्हा नोंद केला आहे. 20 ग्रॅम वजनाचे 10 पुड्या ड्रग्ज पकडले असुन हे ड्रग्ज कुठून आणले होते व कोणाला दिले जाणार होते याचा तपास पोलिस करीत आहेत. पोलीस अधीक्षक अतुल कुलकर्णी, अपर पोलीस अधीक्षक प्रीतम यावलकर, उपविभागीय पोलीस अधिकारी जालिंदर नाकुल व पोलीस निरीक्षक बालाजी कुकडे यांच्या मार्गदर्शनाखाली पोलीस उपनिरीक्षक उमाकांत कुंजीर व त्यांच्या पथकाने ही कारवाई केली.
असद देहलुज व इतर ड्रग्जबाबत काही स्थानिक नागरिक, लोकप्रतिनिधी व पत्रकार यांनी धाराशिव पोलिस यांना माहिती दिली होती मात्र सोलापूर पोलिसांनी कारवाई करीत बाजी मारली, आता बार्शीचे धागे कुठपर्यंत आहेत हे समोर येणे गरजेचे आहे. तुळजापूर येथील ड्रग्ज तस्करीचा धाराशिव पोलिस तपास सुरु आहे. यापुर्वी एकदा परंडा येथे ड्रग्ज प्रकरणी गुन्हा दाखल झाला होता मात्र प्रयोगशाळा तपासणीत ते ड्रग्ज नसुन कॅल्शियम क्लोराईड असल्याचे निष्पन्न झाले. पोलिसांनी गैरसमजीतून गुन्हा दाखल केल्याने गुन्हा रद्द करण्याची शिफारस धाराशिव पोलिसांना करायची नामुष्की आली, त्यावर 24 एप्रिलला सुनावणी आहे. बार्शी येथे आता परंडयातील 2 जन अडकले असल्याने धाराशिव पोलिसांना संधी आहे.
परांडा रोडवरील स्वराज हॉटेल समोर बुधवार 17 एप्रिल रोजी रात्री 11.30 च्या सुमारास बार्शी शहर पोलिसांनी मोठी कारवाई करत 13 लाख 88 हजार रुपयांचा मुद्देमाल हस्तगत केला आहे. या प्रकरणी बार्शी शहर पोलीस ठाण्यात गुन्हा दाखल करण्यात आला आहे. आरोपींमध्ये असद हसन देहलुज (वय 37, रा. पल्ला गल्ली, परांडा), मेहफुज महंमद शेख (वय 19, रा. बावची, परांडा) आण सिरफराज उर्फ गोल्डी अस्लम शेख (वय 32 रा.काझी गल्ली, बार्शी) यांचा समावेश आहे. एनडीपीएस ऍक्ट कायदा आणि महाराष्ट्र पोलीस कायद्यानुसार गुन्हा दाखल करण्यात आला आहे. असद देहलूजकडे 9.19 ग्रॅम ड्रग्ज 5 पुड्या व पिस्टल, मेहफुज शेख कडे 5.73 ग्रॅम ड्रग्ज 2 पुड्या व सरफराज उर्फ गोल्डी कडे 5.12 ग्रॅम 3 पुड्या असे 20 ग्रॅम ड्रग्ज जप्त केले.
