धाराशिव – समय सारथी
धाराशिव नगर परिषदेचे जुलै 2020 ते 23 डिसेंबर 2022 या काळातील विशेष लेखापरीक्षण करण्यात येणार असुन यासाठी वित्त विभागाच्या स्थानिक निधी लेखापरीक्षण विभागाने 4 अधिकाऱ्यांची समिती गठीत केली आहे. आमदार सुरेश धस यांनी धाराशिव नगर परिषदेतील भ्रष्टाचारबाबत आवाज उठवला होता, नगर परिषदेतील गैरव्यवहार बाबत विशेष लेखा परीक्षण करण्याची मागणी केली होती त्यानुसार ही समिती गठीत करण्यात आली आहे .
ठेकेदार, विकास योजना व इतर खर्चाची 27 कोटी 34 लाख रुपयांची 514 प्रमाणके म्हणजे व्हाऊचर गहाळ असुन या प्रकरणात गुन्हा देखील नोंद आहे. अनेक विकास कामांच्या मूळ संचिका गायब असुन केवळ बिले अदा केली आहेत, विशेष लेखापरीक्षणातुन अनेक बाबी समोर येणार आहेत.
मुंबई स्थानिक निधी लेखापरीक्षा अधिनियम 1930 मधील कलम 3 (इ) व मुंबई स्थानिक निधी लेखापरीक्षा नियम 1931 मधील नियम 15 च्या तरतुदी विचारात घेऊन संचालक, संचालनालनालय, स्थानिक निधी लेखापरीक्षा, नवी मुंबई यांचे विशेष लेखापरीक्षण मंजुरी आदेशानुसार धाराशिव नगरपरिषदेतील गैरकारभाराच्या सर्दर्भात हे लेखापरीक्षण होणार आहे. तत्कालीन मुख्याधिकारी हरीकल्याण येलगट्टे व वसुधा फड यांच्या कार्यकाळातील लेखापरीक्षण होणार आहे.
विशेष लेखापरीक्षण पथकात शाम कडेकर, जिल्हा लेखापरीक्षा अधिकारी, स्थानिक निधी लेखापरीक्षा, लातुर, सूर्यकांत भोयटे, सहायक लेखापरीक्षा अधिकारी, धाराशिव, भरत तिरुके, वरिष्ठ लेखापरीक्षक, धाराशिव व सोमनाथ बडे, कनिष्ठ लेखापरीक्षक, धाराशिव यांचा समावेश आहे. विशेष लेखापरीक्षण अहवालाचे पुनर्विलोकन व अंतिमीकरण सह संचालक, स्थानिक निधी लेखापरीक्षा, छत्रपती संभाजीनगर हे करतील, असे दीपाराणी देवतराज यांच्या आदेशात नमुद केले आहे.
