धाराशिव – समय सारथी
तुळजापूर येथील ड्रग्ज तस्करीच्या गुन्ह्यात आरोपी विनोद गंगणे यांच्या रिमांड वेळी कोर्टात मोठ्या घडामोडी घडल्या. जिल्हा व सत्र न्यायाधीश टी जी मिटकरी यांनी अनेक प्रश्न उपस्थितीत करीत गंगणे यांना 12 जुनपर्यंत पोलीस कोठडी दिली. गंगणे हे स्वतःला या गुन्ह्यात पोलिसांचा खबरी असल्याचे सांगत आहेत मात्र या गुन्ह्याच्या काळात त्यांनी वापरलेले मोबाईल त्यांनी पोलिसांना दिले नाहीत उलट त्यांनी गुन्हा नोंद झाल्यावर मोबाईल गहाळ झाल्याचा गुन्हा नोंद केला, यावर कोर्टाने प्रश्न उपस्थिती केला आहे. कोर्टाने याची नोंद घेत भूमिकेवर संशय व्यक्त केला आहे. आता पुराव्यांचा सगळा ‘खेळ’ हा ‘गहाळ’ मोबाईल भोवती आहे.
कोर्टाने पोलिसांना गंगणे यांच्या रिमांडच्या अनुषंगाने काही मुद्दे उपस्थितीत केले त्याची समाधानकारक उत्तरे अधिकारी पी आर टेकाळे (त्या दिवशी पदभार असलेले) यांना देता आली नाहीत त्यामुळे कोर्टाने त्यांना काही वेळ दिला. त्यानंतर त्यांनी सांगितले की ते प्रोबेशनरी अधिकारी असुन त्यांनी काही मुद्दे रिमांडमध्ये समाविष्ट केले. तपास अधिकारी म्हणाले की गुन्ह्यांचे गंभीर स्वरूप असुन आरोपी विनोद गंगणे यांचा या गुन्ह्यातील सहभाग हा ड्रग्ज खरेदी, ड्रग्ज सप्लायर आणि मुंबई येथील मुख्य ड्रग्ज तस्कर यांच्याशी थेट संपर्क इतका आहे, ते या गुन्ह्यातील मुख्य आरोपी आहेत. सीडीआर व एसडीआर व इतर आधारे गंगणे यांची अधिकची चौकशी होणे गरजेचे आहे.
आरोपी विनोद गंगणे यांनी या गुन्ह्यात वापरलेले त्यांचे 2 फोन पोलिसांना दिले नाहीत. गुन्हा नोंद झाल्यावर गंगणे यांनी ते फोन गहाळ झाल्याची तक्रार केली. गंगणे यांचे नाव 25 मार्च रोजी निष्पन्न झाले त्यानंतर 28 मार्चला ते फरार असताना त्यांचे फोन गहाळ झाल्याची तक्रार केली. एक प्रकारे गंगणे यांनी ‘पुरावे नष्ट’ केल्याचे गुन्हेगारी कृत्य केले असुन त्यांची गुन्हेगारी मानसिकता (क्रिमिनल माईंड) दिसुन येते असे जिल्हा सरकारी वकील ऍड महेंद्र देशमुख म्हणाले. एकदरीत त्या 2 गहाळ मोबाईलमध्ये अनेक पुरावे असल्याची शक्यता असुन ड्रग्ज तस्करीसह इतर अवैध धंद्याची मोठी लिंक समोर येऊ शकते, मात्र पोलिसांना ते अद्याप सापडले नाहीत, हे मोठे अपयश आहे.
गंगणे यांनी शांत डोक्याने (कोल्ड ब्लडेड) कट रचून कॅश देऊन दुसऱ्याच्या नावाने फोन पे ने व्यवहार करुन खरेदी केलेले 1 लाख 85 हजार रुपयांचे ड्रग्ज, बापु काणे यांच्या 50 व स्वतःच्या 35 अश्या 85 पुड्या ड्रग्ज डिलिव्हरी स्वतः घेऊन केलेले 2 लाख 95 हजाराचे ड्रग्ज, मुंबई येथील आरोपीशी थेट व्यवहार व संभाषण आणि 2 गहाळ मोबाईल हे मुद्दे अडचणीचे ठरत आहेत. पोलिसांनी भुमिका कधी तळ्यात तर कधी मळ्यात असल्याने 3 वेळेस कोर्टाने ताशेरे ओढले आहेत. गंगणे यांना सुद्धा काही आरोपीनी पैसे पाठवत आर्थिक व्यवहार केले आहे, दोघांचे एकमेकांना व्यवहार झाले आहेत.
