धाराशिव – समय सारथी
धाराशिव जिल्ह्यातील पेट्रोल डिझेल पंपाना जिल्हाधिकारी यांचे महत्वाचे आदेश देत नोटीस पाठवली आहेत. आपातकालीन यंत्रणा, रुग्णवाहिका, अग्नीशमन यंत्रणा, शासकीय कार्यालयातील वाहनांना लागणारे पेट्रोल डिझेल रिझर्व करण्याचे आदेश दिले आहेत. जिल्हाधिकारी डॉ सचिन ओम्बासे यांनी आदेश दिले असुन पेट्रोल डिझेल कोटा राखीव न ठेवल्यास कारवाई होणार आहेत. पंपावर होणारी वाढती गर्दी व पेट्रोल तुटवडा पाहता प्रशासन ऍक्शन मोडवर आले आहे.
देशातील ट्रक व टँकर चालकांनी पुकारलेल्या संपामुळे तेलशुध्दीकरण केंद्रावरुन जिल्ह्यातील पेट्रोल,डिझेल पंपावर होणारा पेट्रोल व डिझेलचा पुरवठा खंडित होऊन जिल्ह्यामध्ये पेट्रोल, डिझेलचा तुटवडा निर्माण होण्याची शक्यता निर्माण झाली आहे.त्यामुळे या परिस्थितीत अत्यावश्यक वस्तू व सेवांचा पुरवठा होण्यास अडथळा निर्माण होऊन कोणतीही आपत्तीजनक स्थिती निर्माण होऊ नये यासाठी उपाययोजना करण्यात येत आहे.
त्याअनुषंगाने तेलशुध्दीकरण केंद्रावरुन जिल्ह्यातील पेट्रोल व डिझेल पंपांना करण्यात येणारा पेट्रोल व डिझेल पुरवठा सुरळित सुरु होईपर्यंत जिल्ह्यातील पेट्रोल व डिझेल पंप चालकांनी त्यांच्याकडे उपलब्ध असलेला पेट्रोल व डिझेलचा साठा हा रुग्णवाहिका तसेच आरोग्यसेवा विभागात कार्यरत असणारी अत्यावश्यक वाहने,पोलिस विभागाकडील वाहने,सरकारी वाहने, अग्निशामक वाहने तसेच अत्यावश्यक वस्तू व सेवांच्या पुरवठ्यासाठी आवश्यक वाहने यांच्यासाठी राखीव ठेवावा व इतर वाहनांना पेट्रोल व डिझेलची विक्री करु नये.
या आदेशाची अंमलबजावणी करण्यासाठी पोलिस अधीक्षक,सर्व उपविभागीय दंडाधिकारी व तालुका दंडाधिकारी यांनी आवश्यक ती कार्यवाही करावी.या आदेशाचे उल्लंघन करणारी व्यक्ती,संस्था अथवा संघटना आपत्ती व्यवस्थापन अधिनियमामधील तरतुदीनुसार दंडनिय/कायदेशीर कारवाईस पात्र राहतील.
या आदेशाची अंमलबजावणी आज 2 जानेवारीपासून तात्काळ लागू करण्यात येत असल्याचे जिल्हाधिकारी तथा जिल्हा दंडाधिकारी डॉ सचिन ओम्बासे यांनी आदेशाद्वारे कळविले आहे.
