धाराशिव – समय सारथी
एका 3 वर्षाच्या अल्पवयीन मुलीवर बलात्कार केल्याप्रकरणी आरोपी निश्चल मधुकर बोंदर याचा जामीन छत्रपती संभाजीनगर उच्च न्यायालयाने नाकारला आहे, त्यामुळे त्याचा जेलमधील मुक्काम वाढला आहे. आरोपी हा 19 सप्टेंबर 24 पासून जेलमध्ये असल्याने धाराशिव येथील ट्रायल कोर्टाने या प्रकरणात सुनावणी घेऊन 6 महिन्याच्या आत निर्णयापर्यंत यावे. 6 महिन्यात सुनावणी पूर्ण न झाल्यास आरोपीला पुन्हा नियमित अर्ज करता येईल, तपास अधिकारी यांनी प्रयोगशाळेचे अहवाल जमा करावेत यासह अन्य बाबींची नोंद घेत न्यायमुर्ती अरुण पेडणेकर यांनी निर्देश दिले आहेत. यात घटना घडल्यावर आरोपी व पीडितेच्या आईचे मोबाईल संभाषण, पीडितेचा जबाब, गुन्ह्याचे स्वरूप या बाबी कोर्टाने ग्राह्य धरल्या.
आरोपीने केलेले कृत्य हे जघन्य अपराध असुन त्याच्या विरोधात पुरावे आहेत, मुलीचे वय व इतर गोष्टी पाहता तिच्या सुरक्षेच्या दृष्टीने धोका असल्याने धाराशिव विशेष न्यायाधीश टी जी मिटकरी यांनी जामीन फेटाळला होता त्यानंतर हे प्रकरण छत्रपती संभाजीनगर उच्च न्यायालयात गेले होते, तिथेही त्याच मुद्यावर जामीन नाकारला. जिल्हा सरकारी वकील महेंद्र देशमुख व ऍड सचिन सुर्यवंशी यांनी सरकार पक्षाच्या वतीने कोर्टात बाजु मांडत जामिनीला विरोध केला. अटकेच्या अर्जाला पिडीत मुलीच्या आईने विरोध केला होता, मुलीचे वडील हे एक वरिष्ठ पोलिस अधिकारी आहेत.
पिडीत मुलीला न्याय मिळावा यासाठी मनोज जरांगे यांनी या प्रकरणात पोलिसांनी कायदेशीर कारवाई करावी असे आवाहन धाराशिव येथील जाहीर सभेत केले होते शिवाय याचा पाठपुरावा खासदार, आमदार या लोकप्रतिनिधी यांनी करावा असे म्हणाले होते. हे प्रकरण विविध अंगाने चर्चेला येत राज्यभर गाजले होते. मुलाला न्याय मिळेपर्यंत कायदेशीर लढा देईल असे जरांगे पाटील म्हणाले होते.
आरोपीने ओळखीचा फायदा घेत घरी खेळण्यासाठी आलेल्या एका अल्पवयीन मुलीवर 21 वर्षाच्या तरुणाने बलात्कार केला, मुलीला रक्तस्त्राव व पोटदुखीचा त्रास झाल्याने तिने ही घटना आईला सांगितली त्यानंतर हा प्रकार उघड झाला. पीडितेला दवाखान्यात उपचारासाठी दाखल करुन गुन्हा नोंद करण्यात आला. भारतीय न्याय संहिता 64,64(2)(1), 64(2),बालकांचे लैंगिक अपराधापासुन संरक्षण अधिनियम 2012 चे कलम 4,6,8,12 नुसार आनंद नगर पोलिस ठाण्यात गुन्हा नोंद करण्यात आला आहे.
