धाराशिव – समय सारथी
एका तरुणीला उपचारा दरम्यान इंजेक्शन देऊन तिच्यावर बलात्कार केल्या प्रकरणी दाखल गुन्ह्यात तुळजापूर येथील बोगस डॉक्टर रमेश लबडे याचा जामीन अर्ज धाराशिव येथील न्यायाधीश टी जी मिटकरी यांनी नाकारला. जिल्हा सरकारी वकील महेंद्र देशमुख यांनी सरकार पक्षाच्या वतीने बाजु मांडली. जामीन नाकारल्याने लबडे याचा जेलमधील मुक्काम वाढला आहे, 18 जानवारीपासुन लबडे जेलमध्ये आहेत. लबडे याच्या वैद्यकीय प्रमाणपत्र बाबत संशय असला तरी एखाद्या डॉक्टरने रुग्णासोबत असे कृत्य करणे चुकीचे आहे, आरोपीला जामीन दिल्यास समाजात एक चुकीचा संदेश पोहचेल असे मत न्यायालयाने व्यक्त केले. आरोपीला जामीन दिल्यास तो पिडीत महिलेवर दबाव आणेल शिवाय पुराव्याशी छेडछाड करेल असे मत नोंदवत जामीन नाकारला.
तुळजापूर तालुक्यातील मंगरूळ येथील बोगस डॉक्टर रमेश राजेंद्र लबडे याने एका 22 वर्षीय तरुणीला इंजेक्शन दिले. इंजेक्शन दिल्यानंतर ती बेशुद्ध झाली. बेशुद्ध अवस्थेत असतानाच डॉक्टरने तिच्यासोबत शारीरिक संबंध प्रस्थापित केले आण या कृत्याचा व्हिडिओही बनवला त्यानंतर आरोपीने पीडितेला एका लॉजमध्ये घेऊन गेला. तिथेही त्याने तिच्यासोबत जबरदस्तीने शारीरिक संबंध प्रस्थापित केले. एवढेच नव्हे तर आरोपीने पीडितेला व्हिडिओ दाखवून ब्लॅकमेल करण्याचा प्रयत्न केला. व्हिडिओ व्हायरल करण्याची आण जीवे मारण्याची धमकी दिली. लबडे यांच्याविरुद्ध भारतीय न्याय संहिता कलम 64 (2), 351 (3) अन्वये 1नोव्हेंबर रोजी गुन्हा दाखल करण्यात आला त्यानंतर डॉ लबडे याला 11 जानेवारीला अटक करण्यात आली त्यानंतर पोलिस कोठडी देण्यात आली.
लबडे याच्याकडे कोणतीही वैद्यकीय पदवी नसल्याची व तो विनापरवाना हॉस्पिटल चालवीत व नशा मुक्ती केंद्राच्या नावाखाली रुग्णावर चुकीचे उपचार करुन आर्थिक लुट करीत असल्याची तक्रार केल्यानंतर जिल्हा आरोग्य अधिकाऱ्यांनी लबडे यांच्या ओम साई हॉस्पिटलची चौकशी केली, चौकशी दरम्यान लबडे यांच्याकडे कोणत्याही प्रकारची वैद्यकीय पदवी नसल्याचे आणि त्याच्या हॉस्पिटलची नोंदणीही महाराष्ट्र वैद्यकीय परिषदेकडे नसल्याचे निष्पन्न झाले, बोगस डॉक्टर लबडे याच्यावर गुन्हा नोंद करुन कारवाई करण्याची मागणी होत आहे. कोर्टात जामीन नाकारताना जिल्हा सरकारी वकिलांनी लबडे याच्या वैद्यकीय प्रमाणपत्रबाबत साशंकता व्यक्त केली आहे.
