धाराशिव – समय सारथी
लाच प्रकरणात एक मोठी बातमी समोर येत आहे, एका तरुणाच्या आत्महत्या प्रकरणात दाखल गुन्ह्यात आरोपीला मदत करण्यासाठी धाराशिव ग्रामीण पोलिस ठाण्याचे पोलिस निरीक्षक मारुती शेळके व महिला पोलीस अंमलदार मुक्ता लोखंडे यांनी लाच मागितली व घेतली आहे. विशेष म्हणजे तक्रारदार महिला ही धाराशिव पोलिस खात्यातील असुन सहकारी महिलेकडुन लाच मागण्यात व घेण्यात आली. आत्महत्या सारख्या गुन्ह्यात लाच घेणे हे एक प्रकारचे मडयाच्या टाळूवरील लोणी खाल्यासारखे आहे. आर्थिक मोह व हाव यामुळे दोन्ही आरोपी अखेर लाचलुचपत विभागाच्या जाळ्यात अडकले असुन हातात बेड्या पडल्या आहेत.
तक्रारदार महिलेच्या मुलाला आत्महत्या गुन्ह्यात कारवाई ण करण्यासाठी 1 लाख रुपयांची लाच मागुन तडजोडी अंती 95 हजार रुपये लाच प्रकरणात धाराशिव लाचलुचपत प्रतिबंधक विभागाने कारवाई केली आहे. ग्रामीण पोलीस ठाण्याचे पोलीस निरीक्षक मारुती शेळके व महिला अंमलदार मुक्ता प्रकाश लोखंडे यांना अटक केली आहे. ही कारवाई धाराशिव शहरातील शासकीय विश्रामगृहाजवळ करण्यात आली.
या प्रकरणी लोखंडे विरुद्ध भ्रष्टाचार प्रतिबंधक अधिनियम 1988 चे कलम 7, 7(अ) अन्वये आणि पोलीस निरीक्षक मारोती शेळके यांच्याविरोधात कलम 12 अन्वये आनंदनगर पोलीस ठाण्यात गुन्हा दाखल करण्याची प्रक्रिया सुरू आहे. ही कारवाई पोलिस उपअधीक्षक योगेश वेळापुरे, निरीक्षक बाळासाहेब नरवटे यांच्या मार्गदर्शनाखाली करण्यात आली. यामध्ये पोलीस अधीक्षक संदीप आटोळे आणि अपर पोलिस अधीक्षक मुकुंद अघाव यांचेही मार्गदर्शन लाभले.
