काहींना दिलासा तर अडचणीत वाढ – 22 आरोपी फरार घोषित – धक्कादायक खुलासे व पुरावे सादर
धाराशिव – समय सारथी
तुळजापूर येथील ड्रग्ज तस्करीत पोलिसांनी कोर्टात 10 हजार 744 पानाचे चार्जशीट दोषारोपपत्र दाखल केले असुन त्यात अनेक धक्कादायक खुलासे करण्यात आले आहेत. ड्रग्ज तस्करीत 36 आरोपी निष्पन्न झाले असुन त्यातील 26 जण हे ड्रग्जचे ‘तस्कर’ असुन 10 जन हे ‘व्यसनी’ असल्याचे नमुद केले आहे. चार्जशीटमुळे काहींना ‘मानसिक’ दिलासा मिळाला आहे तर काहींच्या कायदेशीर अडचणीत वाढ झाली आहे. तपासात पोलिसांनी 114 पंच व साक्षीदार घेतले असुन महत्वपूर्व असलेल्या 7 साक्षीदारांचे जबाब कलम 183 प्रमाणे कोर्टात घेतले आहेत त्यात 3 महिला साक्षीदार यांचा समावेश आहे. दोषारोप पत्रात तपासानुसार अनेक धक्कादायक खुलासे करण्यात आले असुन ते लवकरच समोर येणार आहेत. 36 पैकी 22 आरोपी गेली 1 महिन्यापासुन फरार राहण्यात यशस्वी राहिले आहेत.
उपलब्ध व समोर आलेल्या पुराव्याच्या आधारे पोलिसांनी आरोपीचे तस्करी करणारे पेडलर व सेवन करणारे असे 2 भागात वर्गीकरण केले असुन तपास सुरु असल्याने अधिकचे पुरावे मिळाल्यास किंवा समोर आल्यास सहभागी म्हणजे ठपका वाढू शकतो. भारतीय नागरी सुरक्षा संहिता कलम 193(9) प्रमाणे पुरवणी दोषारोप पत्राची तजवीज राखून ठेवली आहे असे पोलिस अधीक्षक संजय जाधव यांनी पत्रकार परिषदेत सांगितले. तामलवाडी पोलिस ठाण्याचे सहायक पोलिस निरीक्षक गोकुळ ठाकुर यांनी हे दोषारोप पत्र दाखल केले असुन त्यात 22 आरोपीना फरार घोषित करण्यात आले आहे, त्यांचा तपास होणे बाकी असुन आणखी पुरावे व आरोपी निष्पन्न होऊ शकतात.
तुळजापूर ड्रग्ज तस्करीत मुंबई येथील तस्कर संगीता वैभव गोळे, वैभव अरविंद गोळे, संतोष अशोक खोत, जीवन नागनाथ साळुंखे, अमित अशोक आरगडे, युवराज देविदास दळवी, संदीप संजय राठोड, विश्वनाथ उर्फ पिंटू मुळे, सयाजी शाहूराज चव्हाण, ऋतुराज सोमनाथ गाडे, सुमित सुरेश शिंदे, संकेत अनिल शिंदे, प्रसाद उर्फ गोटन कदम, राहुल सुनील कदम, गजानन उर्फ हंग्या प्रदीप हंगरगेकर, स्वराज उर्फ पिनू तेलंग, माजी नगराध्यक्ष चंद्रकांत उर्फ बापु कणे व संतोष उर्फ मेंबर देविदास कदम परमेश्वर, उदय उल्हासराव शेटे, अभिजित अनिल गव्हाड, विनायक विश्वासराव इंगळे, रणजीत रंगनाथ पाटील, अर्जुन हजारे, नाना कुऱ्हाडे, सुलतान उर्फ टिपू लतीफ शेख, इंद्रजीतसिंह उर्फ मिटू रणजितसिंग ठाकुर अश्या 26 आरोपीना ड्रग्ज तस्कर म्हणुन आरोपी करीत दोषारोप पत्र दाखल केले आहे.
26 आरोपीनी संगणमत करुन ड्रग्जची खरेदी विक्री, वाहतूक, साठवणूक केली, पैसे पुरविले तसेच त्याचा वापर व सेवन केले. ड्रग्ज तस्करीतुन बेकायदेशीर आर्थिक फायदा घेऊन अवैध संपत्ती कमावली असा ठपका ठेवण्यात आला असुन एनडीपीएस कायदा 1985 चे कलम 8(क) 21(ब) 27, 27(क) 29, 68(सी) प्रमाणे दोष ठेवला आहे.
अलोक काकासाहेब शिंदे, शाम विठ्ठलराव भोसले, संदीप भगवानराव टोले, जगदीश जीवनराव पाटील, विनोद उर्फ पिटू विलास गंगणे, माजी सभापती शरद रामकृष्ण जमधाडे, विशाल सुनील सोंजी, आबासाहेब गणराज पवार, अभिजीत अण्णासाहेब अमृतराव व दुर्गेश युवराज पवार यांनी ड्रग्ज विक्री करणाऱ्याकडुन ड्रग्ज विकत घेऊन सेवन करुन कलम 27 चे उल्लंघन केल्याने त्यानुसार दोषारोप ठेवण्यात आला आहे. या 10 आरोपीचे ड्रग्ज विकत घेण्यासाठी केलेले पैशाचे व्यवहार, कॉल रेकॉर्ड, साक्षीदार यांचे जबाब व इतर पुरावे सापडले आहेत. ड्रग्ज तस्करीत पोलिस तपास सुरु असुन काही नवीन पुरावे समोर आल्यास दोषारोप पत्रातील अर्थात गुन्ह्यातील सहभाग वाढू शकतो, शिवाय पोलिसांनी काही जणांना नोटीसा दिल्या असुन त्यात काही निष्पन्न झाल्यास आरोपीची संख्या वाढू शकते.
आमदारांची मुक्तीची ‘प्रेरणा’ अन भाईचा ड्रग्ज तस्करीचा ‘भांडाफोड’
तुळजापुरचे भाजप आमदार राणाजगजीतसिंह पाटील यांनी तेरणा रुग्णालय नेरुळ मार्गे बडोदा येथे उपचार, समुपदेशन करुन पिटू गंगणे यांचे मन व मत परिवर्तन केले, असे विजय गंगणे यांनी तुळजापूर येथील जाहीर पत्रकार परिषदेत सांगितले. ड्रग्ज तस्करीत विजय गंगणे यांना पोलिसांनी साक्षीदार करीत जबाब नोंदवीला आहे. आमदार पाटील यांनी मुक्तीची ‘प्रेरणा’ दिल्यानंतर विनोद उर्फ पिटू भाई गंगणे यांनी ड्रग्ज तस्करीची 3 वेळेस ‘टीप’ दिली, 2 वेळेस अपयश आले मात्र तिसऱ्या वेळी रंगेहात पकडून देऊन ‘भांडाफोड’ केला त्यामुळे मुंबईसह सोलापूर, पुणे तुळजापूर असे गेली 3 वर्ष सुरु असलेले सिंडीकेट समोर आले.
ड्रग्ज व्यसनमुक्त झाल्यानंतर तुळजापूर येथील तरुणांची व्यसनांध बिकट स्तिथी पाहून गंगणे यांना मनस्वी पश्चाताप झाला आणि त्याचं भावनेतून त्यांनी व आमदार पाटील यांनी धाराशिव पोलिसांच्या मदतीने ड्रग्ज तस्करी उघड केली. राणा दादांना दोष देऊ नका, त्यांनीच हे केले आहे,ते चांगले आहेत असे आवाहन गंगणे यांनी केले. पोलिसांकडे कोणतीही ठोस माहिती नव्हती, विधानसभा निवडणुकीत महिलांनी तक्रार केली व त्यानंतर आपण पोलिसांना ठोस माहिती दिली त्यामुळे हे रॅकेट उघड झाल्याचे आमदार राणाजगजीतसिंह पाटील यांनी वारंवार जाहीर भाषणात सांगितले. पोलिसांपेक्षा आमदार राणाजगजीतसिह पाटील व पिटू गंगणे यांची भुमिका यात अधिक महत्वाची व अधोरेखित ठरली. विजय गंगणे यांनी सांगितले प्रमाणे पोलिसांनी तंतोतंतपणे 15 एप्रिलला चार्जशीट कोर्टात दाखल केले. पिटू भाई गंगणे याच्यावर ड्रगजचे सेवन केल्याचा ठपका ठेवत दोषारोप पत्रात आरोपी केले आहे, त्यामुळे त्यांना काही प्रमाणात दिलासा मिळाला आहे.
तपासात याची भुमिका महत्वाची ठरली
पोलिस अधीक्षक संजय जाधव व अपर पोलीस अधीक्षक शफकत आमना मॅडम, तत्कालीन अपर पोलिस अधीक्षक गौहर हसन, उपविभागीय अधिकारी डॉ निलेश देशमुख, जिल्हा सरकारी वकील ऍड महेंद्र देशमुख यांच्या मार्गदर्शनाखाली तपास अधिकारी पोलीस निरीक्षक गोकुळ ठाकुर यांनी हे दोषरोप पत्र दाखल केले. तपास, पंचनामे, तांत्रिक पुरावे, विश्लेषण, कागदपत्रे, त्रुटी दुर करणे यासह कोर्टात पोलिसांच्या वतीने सरकारची बाजु मांडणे यात या सगळ्यांचा महत्वपूर्ण सहभाग राहिला.
