धाराशिव – समय सारथी
बार्शी येथील ड्रग्ज तस्करीतील 3 आरोपीना कोर्टाने 5 दिवसांची पोलिस कोठडी सुनावली आहे, आरोपी असद हसन देहलुज (वय 37, रा. पल्ला गल्ली, परांडा), मेहफुज महंमद शेख (वय 19, रा. बावची, परांडा) आण सिरफराज उर्फ गोल्डी अस्लम शेख (वय 32 रा.काझी गल्ली, बार्शी) यांना 20 ग्रॅम वजनाचे 10 पुड्यासह पोलिसांनी अटक केली होती. 3 पैकी 2 आरोपी परंडा येथील. असल्याने याकडे धाराशिव जिल्ह्याचे लक्ष लागले आहे.
ड्रग्ज कुठून आणले होते व कोणाला दिले जाणार होते, पुरवठादार कोण? गावठी पिस्टल कोणाकडुन आणले त्याचा वापर इतर गुन्ह्यात झाला का? आरोपीचे मोबाईल, कॉल डिटेल, सोशल मीडिया यासह अन्य बाबी तपास, अमली पदार्थ व शस्त्र विक्रीचा व्यवहार, इतर साथीदार याचा तपास करण्यासाठी पोलिसांनी 5 दिवसांची पोलिस कोठडी मागितली त्यानुसार ती देण्यात आली. पोलीस अधीक्षक अतुल कुलकर्णी, अपर पोलीस अधीक्षक प्रीतम यावलकर, उपविभागीय पोलीस अधिकारी जालिंदर नाकुल व पोलीस निरीक्षक बालाजी कुकडे यांच्या मार्गदर्शनाखाली पोलीस उपनिरीक्षक उमाकांत कुंजीर व त्यांच्या पथकाने ही कारवाई केली.
परांडा रोडवरील स्वराज हॉटेल समोर बुधवार 17 एप्रिल रोजी रात्री 11.30 च्या सुमारास बार्शी शहर पोलिसांनी मोठी कारवाई करत 13 लाख 88 हजार रुपयांचा मुद्देमाल हस्तगत केला आहे. या प्रकरणी बार्शी शहर पोलीस ठाण्यात गुन्हा दाखल करण्यात आला आहे. एनडीपीएस ऍक्ट कायदा आणि महाराष्ट्र पोलीस कायद्यानुसार गुन्हा दाखल करण्यात आला आहे. असद देहलूजकडे 9.19 ग्रॅम ड्रग्ज 5 पुड्या व पिस्टल, मेहफुज शेख कडे 5.73 ग्रॅम ड्रग्ज 2 पुड्या व सरफराज उर्फ गोल्डी कडे 5.12 ग्रॅम 3 पुड्या असे 20 ग्रॅम ड्रग्ज जप्त केले.
