कळंब शहरातील मध्यवर्ती भागात गोळ्या झाडून खून झाल्याने खळबळ
कळंब – समय सारथी ( अमर चोंदे )
कळंब शहरात पहाटे गोळ्या झाडून खून झाल्याचा धक्कादायक प्रकार घडला आहे. ऐन शहराच्या मध्यवर्ती भागात खून झाल्याने शहरात खळबळ उडाली आहे. शहरातील मार्केट यार्डमध्ये जाधव यांची आडत आहे. तेथे पाच ते सहा हमाल काम करतात. त्यापैकी मचिंद्र माने (अंदाजे वय 40 ) हा हमालीसोबत जाधव यांच्या अडतीवर वॉचमन म्हणून देखील काम करत होता. दरम्यान जाधव यांच्या अडतीच्या बाहेरच्या परिसरात माने झोपला होता.
अचानक एकजण भिंतीवरून उडी मारून आला आणि त्याने मानेला मारहाण करायला सुरुवात केली. दोघांमध्ये झटापटी झाली आणि आणि नंतर माने खाली पडले. सीसीटीव्हीमध्ये हा प्रकार कैद झाला असुन या झटापटीत स्पार्क झाल्याचं दिसतं त्यानंतर माने खाली पडले. त्यामुळे माने यांना देशी पिस्तुलने गोळ्या झाडल्याची शक्यता वर्तवली जात आहे.
माने यांच्या पोटावर आणि छातीवर जखमेचे वण दिसतायेत. ही घटना घडल्याचे कळताच जाधव यांनी पोलिसांना याबाबत माहिती दिली. शहरात खून झाल्याने तात्काळ अतिरिक्त पोलीस अधीक्षक संदीप पालवे यांनी घटनास्थळी पोहोचून परिसरात लोकांकडून आणि आडत मालकांकडून माहिती घेतली. तसेच लागलीच श्वान पथक देखील घटनास्थळी दाखल झाला होता. माने यांच्या वैक्तिक कारणामुळे त्यांचा खून झाला की मारेकरी दरोड्याच्या हेतूने आले होते की अन्य कारणामुळे याबाबतचा अधिक तपास पोलीस करत आहेत.
