डाव उधळला – प्रशासन वेळीच सतर्क झाल्याने अर्ज नामंजुर – संघटीत गुन्हेगारी – मास्टर माईंड कोण ?
धाराशिव – समय सारथी
बोगस मतदार नोंदणी अर्ज दाखल करण्याच्या एक एक घटना दिवसेंदिवस समोर येत असुन तुळजापूर विधानसभा मतदार संघात मोठा घोळ असल्याचे तपासणीत समोर आले आहे. तुळजापूर मतदार संघात तब्बल 5 हजार पेक्षा अधिक बोगस अर्ज वेगवेगळ्या गावात मतदार नोंदणीसाठी दाखल करण्यात आले होते, ते बीएलओ स्तरावर मंजुरीसाठी प्रलंबित होते. दैनिक समय सारथीने ही बाब उघड करीत प्रशासनाच्या लक्षात आणुन देताच हे सगळे 5 हजार अर्ज नामंजुर करण्यात आले. प्रशासन वेळीच सतर्क झाल्याने बोगस मतदार नोंदणीचा डाव उधळला आहे. संघटीत गुन्हेगारी सारखा हा प्रकार असुन याचा मास्टर माईंड पोलिसांनी शोधणे गरजेचे आहे. हंगरगा येथे दाखल गुन्ह्यात हे सर्व 5 हजार अर्ज तपासासाठी वर्ग केले जाणार आहेत त्यामुळे गुन्ह्याची व्याप्ती वाढली आहे. राजकीय आरोप प्रत्यारोप होत असले तरी पोलिसांच्या तपासावर सर्व बाबी अवलंबुन आहेत.
तुळजापूर तालुक्यातील हंगरगा नळ येथे 40, धाराशिव तालुक्यातील रुईभर या गावात 9 नंतर सिंदफळ येथे 13 अर्ज बोगस आधारकार्ड वापरून दाखल केले गेले त्यानंतर तुळजापूर मतदार संघातील जवळपास 100 पेक्षा अधिक मतदान केंद्रावर बोगस अर्ज नोंदणीचे प्रकार चावडी वाचन वेळी समोर आले. हंगरगा, रुईभर व सिंदफळ, काटीसह इतर गावातील कनेक्शन सेम असुन आधार एनरॉलमेंट नंबर सारखेच आहेत.
हंगरगा गावात जे बोगस आधारकार्ड नामांकन क्रमांक वापरले गेले आहेत तेच क्रमांक सिंदफळ, रुईभर, काटी व इतर गावात वापरण्यात आले आहेत त्यामुळे या ठिकाणसह अन्य भागात एक मोठे रॅकेट असल्याच्या बाबीला पुष्टी मिळाली आहे. सिंदफळ, रुईभर व इतर 100 ठिकाणी वापरण्यात आलेले आधार कार्डचे नंबर अस्तित्वात नसुन सगळ्यांची वेळ व नंबर एकच आहे.आधार कार्डवर डिजीटल सहीमध्ये दिनांक व वेळ एकसमान असल्याचे आढळून आले, अर्ज भरताना कॉलेजच्या विद्यार्थी व विद्यार्थिनी यांचे फोटो वापरण्यात आले असुन त्यांच्या आधार कार्डवर स्थानिक गावचा पत्ता दाखवला आहे, जो की चुकीचा असुन ते स्थानिक रहिवासी नाहीत.
तुळजापूर विधानसभा मतदार संघातील हंगरगा गावात बोगस नव मतदार अर्ज नोंदणी प्रकरणात 40 जणांवर निवडणूक निर्णय अधिकारी डॉ सचिन ओम्बासे यांच्या आदेशानंतर तुळजापूर विधानसभा मतदार संघाचे सहायक मतदार नोंदणी अधिकारी तथा तहसीलदार अरविंद बोळंगे यांनी दिलेल्या तक्रारीवरून गुन्हा नोंद करण्यात आला आहे.त्याचा तपास तुळजापूर पोलीस करीत आहेत.
धाराशिव जिल्ह्यात 20 ऑक्टोबर रोजी रविवारी सर्व 4 ही विधानसभा मतदार संघातील गावात मतदार याद्याचे चावडी वाचन झाले त्याचा तपशील सोमवार पर्यंत अपेक्षित आहे. लोकसभा निवडणुकीनंतर ज्या नावांची नोंदणी करण्यात आली आहे त्या सर्व नावाची व सोबत जोडलेल्या कागदपत्रे तसेच जे अर्ज बीएलओ यांनी नामंजुर केले त्या सोबत जोडलेल्या कागदपत्रे यांची पुन्हा एकदा तपासणी झाली जिल्हाधिकारी तथा निवडणुक निर्णय अधिकारी डॉ सचिन ओम्बासे यांच्या आदेशाने झाली आहे.
