5 आरोपीना अटक – वाशी तालुक्यातील शेलगाव येथे पवनचक्की साईटवर तोडफोड व मारहाण प्रकरण
धाराशिव – समय सारथी
धाराशिव जिल्ह्यातील वाशी तालुक्यातील शेलगाव येथे एका पवनचक्की कंपनीच्या साईटवर धुडघूस घालत तेथील वाहने, कार्यालयाची तोडफोड करीत कामगार व स्थानिक नागरिकांना बेदम मारहाण केल्याच्या प्रकरणात पोलिसांनी धडक कारवाई केली आहे. पोलिसांनी 5 आरोपीना अटक केली असल्याची माहिती पोलीस अधीक्षक अतुल कुलकर्णी यांनी दिली. पोलीस अधीक्षक कुलकर्णी हे स्वतः या विषयात लक्ष देऊन आहेत त्यामुळे पवनचक्की माफियाचे धाबे दणाणले आहे.
विजय शेरकर, यश उकरंडे, अभिजीत सुरवसे, धनाजी वासकर व सौरभ हुके अशी अटक केलेल्या आरोपींची नावे आहेत. या मारहाण प्रकरणी वाशी पोलीस ठाण्यात अज्ञात आरोपी विरोधात कलम 324,427,143,147 सह अन्य कलमाद्वारे गुन्हा नोंद करण्यात आला आहे.
मागील काही दिवसात लोहारा,उमरगा,भुम,परंडा वाशी या भागात पवनचक्की माफियाचा धुडगुस सुरु असुन याला राजकीय पाठबळ मिळत असल्याने आरोप प्रत्यारोपावरून राजकारण सुद्धा तापले आहे, असे असतानाच या भागात पुन्हा एकदा पवनचक्की साईटवर मारहाण व गोंधळ घातल्याची घटना घडली आहे. कधी पवनचक्की मालकांकडून पैसे मागणे तर कधी त्यांना प्रोटेक्शन मनीच्या नावाखाली खंडणी उकळणे, शेतकऱ्यांना धमकावणे असे प्रकार सुरु आहेत.
