धाराशिव – समय सारथी
तुळजापूर येथील ड्रग्ज तस्करी गुन्ह्यात माजी नगराध्यक्ष चंद्रकांत उर्फ बापु कणे व स्वराज उर्फ पिनू तेलंग या 2 आरोपीना धाराशिव येथील न्यायालयाने 14 दिवसांची पोलिस कोठडी सुनवली आहे, पोलिसांच्या दोषारोप पत्रानुसार कणे व तेलंग हे तस्कर गटातील आरोपी आहेत. ड्रग्ज तस्करी गुन्ह्यात 38 आरोपी असुन अलोक शिंदे,उदय शेटे व विनोद उर्फ पिटू गंगणे या 3 आरोपीना जामीन मिळाला आहे. 11 आरोपी फरार असुन 21 आरोपी धाराशिव येथील कारागृहात आहेत. जिल्हा सरकारी वकील ऍड महेंद्र देशमुख यांनी कोर्टात बाजु मांडली.
38 पैकी 11 आरोपी फरार असुन त्यांना अटक करणे पोलिसांसमोर एक आव्हान असणार आहे, पालकमंत्री प्रतापराव सरनाईक यांनी सर्व फरार आरोपीना 15 ऑगस्टपर्यंत अटक करुन जामीनावर असलेल्या आरोपीवर मकोका अंतर्गत कारवाई करावी असे आदेश दिल्याने पोलिस यंत्रणा कामाला लागली आहे.
7 आरोपींचे जामीन अर्ज धाराशिव येथील जिल्हा व सत्र न्यायाधीश टी जी मिटकरी यांच्या कोर्टात सुनावणी स्तरावर प्रलंबित आहे. माजी नगराध्यक्ष संतोष कदम परमेश्वर, नानासाहेब खुराडे व दुर्गेश पवार या 3 जणांच्या जामीन अर्जावर 30 जुलै, पिट्टा सुर्वे व शामकुमार भोसले या 2 जणांच्या अर्जावर 25 जुलै, रणजीत पाटील यांच्या अर्जावर 28 तर नियमित सुनावणी 29 जुलै रोजी होणार आहे.
फरार आरोपीत मुंबई येथील मुख्य तस्कर वैभव गोळे, इंद्रजीतसिंह उर्फ मिटू ठाकुर, प्रसाद उर्फ गोटन कदम परमेश्वर, अभिजीत गव्हाड, विनायक इंगळे,शाम भोसले,संदीप टोले,जगदीश पाटील,विशाल सोंजी,दुर्गेश पवार व सोलापुर जिल्ह्यातील उपळाई येथील अर्जुन हजारे यांचा समावेश आहे. पोलिसांनी 38 आरोपींचे सेवन व तस्कर असे 2 गट केले असुन 28 आरोपी तस्कर तर 10 आरोपी सेवन गटात आहेत.
अशी झाले अटकसत्र – 25 आरोपी
तुळजापूर येथील अमित उर्फ चिमू अशोकराव आरगडे व युवराज देविदास दळवी आणि नळदुर्ग येथील संदीप संजय राठोड या 3 आरोपीना 45 ग्रॅम ड्रग्ज असलेल्या 59 पुड्या ड्रग्जसह 15 फेब्रुवारीला तामलवाडी येथे रंगेहात अटक करण्यात आली. त्यानंतर या 3 आरोपीना ड्रग्ज पुरवठा करणारी मुंबई महिला तस्कर संगीता गोळेला 22 फेब्रुवारी,संतोष खोतला 27 फेब्रुवारी,तुळजापूर तालुक्यातील सराटी येथील विश्वनाथ उर्फ पिंटू मुळे याला 28 फेब्रुवारीला अटक करण्यात आली. सोलापूरहुन ड्रग्ज खरेदी करणारे सयाजी चव्हाण, सुमित शिंदे, ऋतूराज गाडे व संकेत शिंदे या 4 जणांना 18 ग्रॅम ड्रग्ज असलेल्या 30 पुड्या ड्रग्जसह 4 मार्च रोजी अटक करण्यात आली. पुणे येथील सुल्तान उर्फ टिपू शेख याला 23 मार्च, सोलापूर येथील जीवन साळुंके व राहुल कदम-परमेश्वर यांना 24 मार्चला अटक केली त्या दिवशी 4 गोपनीय व नवीन 6 अशी 10 जणांची नावे उघड केली. गजानन हंगरकर याला 26 मार्चला अटक केली त्यानंतर पोलिसांनी कोर्टात 26 मार्चला नवीन 10 आरोपींची नावे जाहीर केली, त्यानंतर 15 एप्रिलला कोर्टात चार्जशीट दाखल करताना माजी नगराध्यक्ष संतोष कदम परमेश्वर यांना 36 वा आरोपी करण्यात आले.
तस्कर गटातील रणजीत रंगनाथ पाटील यांना 1 मे रोजी अटक केली त्यानंतर 16 मे रोजी माजी उपसभापती शरद जमदाडे यांना अटक केली. 17 मे रोजी आबासाहेब पवार याला पुणे येथून तर 19 मे रोजी नानासाहेब खुराडे याला ठाणे जिल्ह्यातील बदनापुर तालुक्यातील वांगणी येथून स्थानिक गुन्हे शाखेच्या पथकाने अटक केली. 29 मे रोजी शुभम नेप्ते या आरोपीला अटक केले त्यानंतर आरोपीची संख्या 36 वरून 37 झाली. 6 जुन रोजी विनोद गंगणे यांचा जामीन अर्ज फेटाळल्यानंतर त्यांना अटक करण्यात आली. 19 जुन रोजी सोलापूर येथून पिट्टा सुर्वे याला अटक करण्यात आली, त्यानंतर आरोपी संख्या 38 झाली. 22 जुन रोजी माजी नगराध्यक्ष संतोष कदम परमेश्वर उर्फ मेंबर यांना अकलूज सोलापूर येथून स्थानिक गुन्हे शाखेने अटक केली.18 जुलै रोजी अभिजीत अमृतराव या आरोपीला अटक केली. माजी नगराध्यक्ष चंद्रकांत उर्फ बापु कणे यांना पुणे तर स्वराज उर्फ पिनू तेलंग याला 21 जुलै रोजी सोलापूर येथील अटक केली.
